Газар зохион байгуулалт, хот төлөвлөлтийн цахим системийн нээлт өчигдөр болж, Барилга, хот байгуулалтын Сайд Х.Баделхан оролцов. Тэр энэ үеэр түүнээс ипотекийн зээлийн санхүүжилттэй холбоотой зарим мэдээллийг өглөө. 

Х.Баделхан:

-"Ипотекийн зээлийн эх үүсвэр нь улсын төсөв, арилжааны банкуудын чөлөөт эх үүсвэр болон Монголбанкны эргэн төлөлт гэсэн гурван эх үүсвэрээс бүрддэг. 2020 оны Улсын төсөвт ипотекийн зээлд 60 тэрбум төгрөг эргэн төлөгдөхгүйгээр тусгасан. Энэ нь арилжааны банкнаас гаргаж буй зээлийн хүүгийн зөрүүг төр даана гэсэн үг. Тэгэхээр арилжааны банкнаас олгох зээлийн хэмжээ өнгөрсөн онтой харьцуулахад хоёр дахин нэмэгдэнэ гэж ойлгох хэрэгтэй.

Жилд дунджаар 10 мянга орчим айл ипотекийн зээлд хамрагдан орон сууцтай болдог. Энэ жил ч зээл үргэлжлэх төдийгүй эх үүсвэр нь нэмэгдэнэ. Ипотекийн зээлд хамрагдсан иргэдийн тоо ба олгосон санхүүжилтийн хэмжээг харвал 2017 оноос хойш тасралтгүй буурсаар 2018 онд гэхэд 295.9 тэрбум төгрөгийн зээлийг 6,470 иргэнд олгосон байна.

Харин шинэ журам хэрэгжүүлж эхэлснээр өнгөрсөн оны арваннэгдүгээр сарын байдлаар нийт 380 тэрбум төгрөгийн санхүүжилтийг 5,287 иргэнд олгосон. Үүний 175.2 тэрбум төгрөгийн санхүүжилтийг 2,513 иргэнд Монголбанкны эх үүсвэрээс, Засгийн газрын эх үүсвэрээс 100 тэрбум төгрөгийн санхүүжилтийг 1,616 иргэнд өгсөн байна. Харин банкууд өөрийн эх үүсвэрээс 105 тэрбум төгрөгийн санхүүжилтийг 1,158 иргэнд олгосон" гэв.