"Эрдэнэс Тавантолгой" компанийн IPO хийхэд Америкийн “MERRILL LYNCH”, “CREDIT SUISSE”, Японы “NOMURA” банкуудыг сонгосон талаар Уул уурхай, хүнд үйлдвэрийн сайд Д.Сумъяабазар өнөөдөр мэдээлсэн. Компанийн хувьцааг Хонг Конгийн хөрөнгийн бирж дээр ирэх оны эхний хагас жилд багтаан гаргаж, нэг тэрбум орчим ам.долларын хөрөнгө босгохоор төлөвлөсөн талаар Bloomberg телевиз мөн мэдээлжээ. Д.Сумъяабазар сайдын хэлснээр бэлтгэл ажил өндөр түвшинд явагдаж байгаа бөгөөд санхүүгийн, хуулийн, техникийн, маркетингийн зөвлөх гээд бүх зөвлөхөө сонгоод, гэрээ байгуулаад ажилдаа орсон гэнэ. 

"Эрдэнэс Тавантолгой" компанийн хувьцааны 30 хувийг олон улсын зах зээлд гаргаж, нийт 4.7 тэрбум ам.доллар босгох замаар төслөө хөдөлгөх боломжтой бөгөөд энэ мөнгөөрөө авто зам, төмөр зам, баяжуулах үйлдвэр, цахилгаан станц, нүүрс химийн үйлдвэр барих бүрэн боломжтой хэмээн Засгийн газар тооцож 180 хоногийн дотор буюу 2019 оны хавар бэлтгэл ажлыг бүрэн дуусгах талаар УУХҮ-ийн сайд өмнө нь ярьж байжээ. Гэвч хугацаа ийнхүү хойшилсноос хөрөнгө босгох хэмжээ нэг тэрбум орчим доллар хэмээн тооцож байгаа юм байна. 

Харин IPO хийх "Эрдэнэс Тавантолгой Майнинг" компанийн тухай сонирхоход Д.Сумьяабазар сайд "IPO-той холбогдуулаад хэлэхэд бүх ажил гэрээний дагуу, биржийн шалгуурыг хангаад явж байгаа учраас биржийн дүрэм журмыг зөрчсөн, хальсан асуудлыг ярих нь тохиромжгүй. Энэ нь анхааруулах шар гэрэл асахад хүргэнэ. Тиймээс санхүүгийн зөвлөхтэйгөө ярилцаад мэдээлэл өгөөд явна. Түүнээс биш нууж, хаагаагүй гэдгийг хэлмээр байна" гэв.