Сонгуулийн өмнөх жил учир нутаг нутгийн шинэ жилүүд сүр дуулиантай эхэлж байх чинь вэ. Энэ сарын 7-нд Хэнтий аймгийн оны шилдгүүдийг тодруулах " ХААН ШОНХОР-2019" тэргүүн ёслолын арга хэмжээ болжээ.  Ёслолын үеэр энэ жилийн улсын баяр наадмын түрүү бөх Э.Оюунболдыг Хэнитийчүүд оны шилдгээр өргөмжилж, "Оны шилдэг амжилт" номинацийн эзэнд "Хаан шонхор" шагналыг хүртээжээ.

Энэ жилийн баяр наадмаар барилдаж тав давж, шөвгөрсөн 16 бөхөөс сэргээшийн шинжилгээ авч, БНСУ-ын лабораторид илгээсэн. Уг лабораториос энэ оны наймдугаар сарын 05-нд ирүүлсэн хариугаар шинжилгээнд хамрагдсан 16 бөхөөс нэр бүхий хоёр бөхөөс авсан дээжид сэргээшийн төрлийн хориотой бодис илэрсэн байдаг.

Хоёр бөхөд шинжилгээний хариуг танилцуулж, гарын үсэг зуруулсан бөгөөд Б сорьцоо шинжлүүлэх хүсэлтээ журамд заасан хугацаанд гаргасан тул Монголын допингийн эсрэг үндэсний төв хүлээн авч, БНСУ-д илгээсэн бол нөгөө бөх журамд заасан хугацаанд шинжлүүлэх хүсэлт гаргаагүй бөгөөд Э.Оюунболдоос авсан дээжид Дэлхийн допингийн эсрэг агентлагаас гаргасан “Хориглосон жагсаалт 2019”-д орсон S1.1A бүлгийн Станазол, S4 бүлгийн мелдониум, S5 бүлгийн гидрохлортиазид, хлориазид хэмээх дөрвөн төрлийн бодис илэрснийг Үндэсний бөхийн салбар хороо мэдэгдсэн байгаа.

Баяр наадмыг зохион байгуулах хорооноос Э.Оюунболд, Д.Цэрэнтогтох нарын барилдаанд барилдаж давсан даваа тус бүрийг хүчингүйд тооцох, барилдах эрхийг хоёр жилээр хасах шийдвэр гаргасан тогтоолоо Ерөнхийлөгчид хүргүүлсэн. Одоогоор Э.Оюунболдын цолыг хураах эсэх асуудлыг Ерөнхийлөгчийн Тамгын газар шийдээгүй байна. 

Э.Оюунболдын хувьд "Би допинг хэрэглээгүй. Миний шээсийг сольсон. Энэ хэргийг хууль хяналтын байгууллагаар шалгуулна. Дахиад гуравдагч оронд шинжилгээ өгмөөр байна" гэх байр сууриа илэрхийлж, Нийслэл дэх Захиргааны хэргийн анхан шатны шүүхэд хандсан тухайгаа мэдээлсэн.

Хэрэг явдал ийм түвшинд байхад Хэнтий амйгийнхан Э.Оюунболдыг нутгийн шилдгээрээ өргөмжилж, дээрээс нь Засгийн газар, УИХ-ын төлөөлөл гишүүд нь ийм шагнал гардуулаад зогсож буйд иргэд шүүмжлэлтэй хандаж байна.