“Монгол орны хөрс судлал-2019” эрдэм шинжилгээний хурал өчигдөр “Холидэй Инн” зочид буудалд боллоо.

Хөрсний бохирдлыг хоёр төрөлд хуваан авч үздэг бөгөөд нийслэлийн хэмжээнд микробилогийн органик бохирдол нийт суурьшлын бүсийн хэмжээгээр 88 хувийг эзэлж, нянгын бохирдолтой хэвээр байна. Төвийн болон үйлдвэрлэлийн бүсэд хөрсний хүнд металлын бохирдол стандарт хэмжээнээс 10-20 дахин хэмжээний агууламжтай байгаад судлаачид хэлж байна.

Хөрсний бохирдлыг бууруулах аргыг технологийн судалгаанд тулгуурлан хийдэг боловч энд ганцхан технологийн аргаар бус түүнийг нэвтрүүлж хэрэглэхэд хууль эрхзүйгээр зохицуулах шаардлагатай байгааг тэд онцлов.

БОАЖ-ын сайдын зөвлөх Г.Нямдаваа, “Монгол орны хөрсөн бүрхүүл нь ялзмагт үе давхарга нимгэн, үржил шимээр ядуу, нэгж талбайгаас бий болох бүтээгдэхүүний хэмжээ бага” гэдгийг хэлэв. Хөрс-уур амьсгалын чадавхи хязгаарлагдмал, хөрсний нөөцийг зохистой ашиглан, хамгаалах эрхзүйн орчин төгөлдөршөөгүй, ашиглагч, эзэмшигчдийн экологийн боловсрол, сэтгэлгээ тааруухан зэргээс шалтгаалан хөрсний элэгдэл эвдрэл, бохирдол эрчимтэй явагдаж бгаа юм байна. Хөрсний нөөцийг зүй зохистой ашиглах, хамгаалахтай холбоотой үйл ажиллагаа хийгдэхгүй, хуримтлагдсаар эцэст нь шийдвэрлэхэд хүндрэлтэй нөхцөл байдалд хүргэж болзошгүйг тэд мөн хэлж байв.

Эрдэм шинжилгээний хурлыг “Дэлхийн хөрсний өдөр"-ийг жил бүрийн арванхоёрдугаар сард тэмдэглэх болсонтой холбогдуулан БОАЖЯ-ны Газар зохион байгуулалт, усны нэгдсэн зохицуулалт, бодлогын газар, ХААИС-ийн Агроэкологийн сургууль хамтран зохион байгуулжээ.