2026 оны хөл бөмбөгийн дэлхийн аварга шалгаруулах тэмцээний (ДАШТ) тасалбарын үнэ 32 970 ам.долларт хүрч, дахин худалдаанд 2.3 сая ам.доллар болж өссөн байна. Үнэ огцом нэмэгдсэнтэй холбоотойгоор Мексикийн Ерөнхийлөгч Клаудия Шейнбаум ФИФА-гаас үнийн бодлогоо эргэн харах, тэмцээнийг хөгжөөн дэмжигчдэд илүү хүртээмжтэй болгохыг уриалжээ.

Ийм өндөр үнэтэй тасалбарууд нь хөгжөөн дэмжигчдийн дийлэнхийг тэмцээн үзэх боломжгүй болгож байна гэж К.Шейнбаум хэлжээ. "Хөл бөмбөг бол өөр утга учиртай байх ёстой. Энэ бол ФИФА дотооддоо ч эргэцүүлэн бодох ёстой асуудал" хэмээн тэрбээр мэдэгдээд, спорт нь хүмүүст хүртээмжтэй байж, дэлхий даяар хүмүүсийг нэгтгэдэг байх ёстой гэдгийг онцолсон байна.

АНУ, Канад, Мексикт болох тоглолтуудын тасалбарын үнэ анх 140-өөс 8 680 ам.долларын хооронд байв. Дараа нь зарим тасалбарын үнэ буурсан боловч гол тоглолтуудынх эрс өссөн байна. Шувтаргын тоглолтын тасалбарууд хамгийн өндөр үнэтэй байгаа бөгөөд 32 970 ам.долларт хүрчээ. Харин дахин худалдаанд үнэ бүр гаарсан байна. ФИФА-гийн тасалбар дахин борлуулах платформд дөрөвдүгээр сард зарим тасалбар бараг 2.3 сая ам.долларт хүрчээ.

Мексикийн Ерөнхийлөгч ДАШТ-ий арилжааны загвар нь хэвийн үзэгдэл гэдгийг хүлээн зөвшөөрсөн хэдий ч спорт нь асар их мөнгө үрдэг орон зай болон хувирч болохгүй гэдгийг онцолсон байна.

Одоогоор ФИФА Мексикийн талын мэдэгдэлд тайлбар өгөөгүй байна. Тус байгууллагын ерөнхийлөгч Жанни Инфантино өмнө нь тасалбарын өртөг нь Хойд Америкийн зах зээлийн жишигт нийцэж байгаа тухай мэдэгдэж байсан юм.

Эх сурвалж: AP