Эрдэнэт хотын унаган хүү, “Эрдэнэт гамп” төслийн санаачлагч, МУСТА, найруулагч, жүжигчин Ш.Мөнхбаяр Улаанбаатар хотоос Эрдэнэт хот хүртэл 400 км замыг амжилттай туулан ирлээ.
Тэрээр “Эрдэнэт гамп” төслийн хүрээнд энэхүү алхалтыг санаачилж, 12 хоногийн турш замд гарч, зорилго, тэсвэр хатуужил, тууштай байдлын үнэ цэнийг хүүхэд, залууст үлгэрлэн харуулахыг зорьжээ. Энэ хугацаанд тэрээр өдөр бүр тодорхой зайг туулж, биеийн болон сэтгэл зүйн сорилттой тулгарсан ч аяллаа амжилттай дуусгасан байна.
Төслийн гол зорилго нь залуучуудад хөдөлгөөнтэй, эрүүл амьдралын хэв маягийг сурталчлах, мөн зорилготой байх, тууштай хөдөлмөрлөхийн ач холбогдлыг таниулахад чиглэж байгаа юм. Жүжигчин Ш.Мөнхбаяр нь 2001 онд Эрдэнэт хотын 1 дүгээр сургуулийг төгссөн бөгөөд төрөлх хотдоо буцан ирж, өөрийн санаачилсан төслөө амжилттай хэрэгжүүлсэн нь онцлох үйл явдал боллоо.
