УИХ-ын гишүүн, БХБ-ын сайд асан З.Баянсэлэнгэ, М.Болортуяа нарын 11 хүнд холбогдох хэргийн шүүх хурал өчигдөр /2019.11.28/ Чингэлтэй дүүргийн Эрүүгийн хэргийн анхан шатны шүүхэд хаалттай боллоо. Шүүгдэгч нарын 20 өмгөөлөгчийн гурав нь хүндэтгэх шалтгааны улмаас оролцох боломжгүй болсон тул шүүх хурлыг түр хойшлуулахаар шийдвэрлэжээ.

Шүүх хурлын дараа шүүгдэгч З.Баянсэлэнгийг үргэлжлүүлэн хорих шийдвэр гарган, хорих анги руу авч явсан байна.

Энэ удаагийн шүүх хуралд З.Баянсэлэнгэ нь өмгөөлөгчгүй оролцсон бөгөөд хоригдож байх хугацаандаа шүүх хуралд өмгөөлөгчтэй оролцох хүсэлтээ удаа дараа өгсөн ч хүсэлтэд хариу өгөөгүй гэдгийг түүний өмгөөлөгч Хууль зүйн ухааны доктор, өмгөөлөгч Л.Мөнхсайхан хэлсэн юм.

Харин М.Болортуяа, Ц.Энхтунгалаг, Д.Ганбаатар, Ж.Бурмаа, Д.Баярсайхан, Б.Цэндсүрэн, Л.Чинбат, Г.Тогтохбаатар, Б.Эрдэнэбаатар, Сун Гуан Чин нарын арван яллагдагчыг шүүх хурал өчигдөр оройн 19.30 цагт завсарласан бөгөөд өнөөдөр үргэлжлүүлэн шүүж байгаа юм. 

Хэргийг сануулбал, түүнийг нийслэлийн прокурорын газраас 2002 оны Эрүүгийн хуулийн тусгай ангийн 263.2 дахь хэсэгт зааснаар албаны эрх мэдэл буюу албан тушаалын байдлаа урвуулан ашигласан хэргээр шүүж байгаа. З.Баянсэлэнгэ нь Барилга, хот байгуулалтын сайдаар ажиллаж байхдаа албан тушаалын байдлаа урвуулан ашиглаж "Бэрэн групп" ХХК-ийн барьсан "Хангай" хотхоны орон сууцнаас 123 айлын орон сууцыг тендер зарлалгүйгээр худалдан авч, улсын төсөвт 972.4 сая төгрөгийн хохирол учруулсан байж болзошгүй хэмээн шүүж  байгаа юм.