Хуульзүйн сайд Ц.Нямдорж бол монголын парламентад хамгийн олон жил сууж буй эрхмүүдийн нэг.  Үүний хэрээр Ц.Нямдоржийн нэр сайнаасаа муу зүйлд олонтоо холбогддог билээ. Тэр бүхнийг хуульзүйн сайд гэх зөөлөн сэнтийнхээ ачаар оргүй хоосонд хувиргаж чаддаг нэгэн гэхэд хилсдэхгүй биз. Тэгвэл энэ удаад түүний хүү Н.Анхбаяр болоод хуурай дүү гэгддэг С.Анхбаяр нарт холбогдох нэгэн хэрэг хэрхэн замхарсан талаар өгүүлье. 

Энэ асуудлыг анх Тагнуулын ерөнхий газрын дарга асан Б.Хурц ажлаа өгөхийнхөө өмнө олон нийтэд мэдээлж байсан юм. Тодруулбал Б.Хурц, "Ц.Нямдоржийн хүүхэд Ц.Анхбаяр, түүний хуурай дүү С. Анхбаяртай холбоотой асуудлаар мөнгө угаасан байж болзошгүй буюу бусад олон асуудлаар хуулийн байгууллагатай хамтрах ажил гурван сар болж байна.  

"Эрдэнэт”-тэй холбоотой маш их бизнес, шахаа хийдэг. Ц.Нямдорж  С.Анхбаяр гэдэг Увсын залуугаар дамжуулж 42 сая ам.долларын бараа нийлүүлсэн байдаг. Энэ гэрээг Н.Алтанхуяг Эрдэнэтийн захирлыг дуудаж үүрэгдсэн. Энд нэг сонин зүйл байдаг. Ханхуур, Хаанхуур гэж компани бий. Эндээс санхүүгийн залилангийн юм харагдана. Улсын бүртгэлийн газар Ц.Нямдоржийн Анхбаяр гээд хүүхэд нь байдгийг та бүхэн мэдэх байх. Ханхуур, Хаанхуур гэж хоёр Анхбаяртай компани байсан юм шиг байгаа юм. Тэр байтугай хуурай дүү Анхбаярынх нь талаар оффшортой холбоотой асуудал байгаа. Мөнгө угаасан энэ хэргийг шалгахаар сүүлийн гурван сар прокурор, АТГ-т хандаад үр дүнд хүрч чадахгүй байгаа. Намайг ингэж дуугарснаас хойш АТГ, прокурор хөдлөх байх” хэмээн мэдэгдэж байсан юм.

Тухайн үед Ц.Нямдорж сайд Төрийн ордноос хариу мэдэгдэл хийхдээ, “Эрдэнэт” үйлдвэрт 42 сая ам.долларын бараа шахсан гээд байгаа С.Анхбаярын бизнесийг би мэдэхгүй. Тэр С.Анхбаяр гэдэг хүн миний багшийн хүүхэд. Намайг тагнахын тулд С.Анхбаяр дээр ТЕГ гүйцэтгэх ажиллагаа хийж, намайг бүтэн жил тагнасан. Би хууль, хяналтын байгууллага толгой дээр гараад байна гэж хэлээд байгаа чинь энэ.  Миний хүү Н.Анхбаярын тухай мэдээлэл гарч байсныг олон нийт мэдэж байгаа” гэж байжээ.

Ингээд удалгүй АТГын байцаагчид “ДЦС-IV” ТӨХК-ийн гүйцэтгэх захирал С.Анхбаярын гэрт нэгжлэг хийж, баривчилсан юм. Улмаар түүнийг Эрүүгийн хуулийн 22.4.1-т зааснаар хоёр жил хорих, төрд ажиллах эрхийг гурван жилээр хасах ял оноосон билээ. Гэвч Ц.Нямдорж сайдын нөлөө орсон уу, яасан түүнд холбогдох хэргийг Дээд шүүхээс хянан хэлэлцээд С.Анхбаярт нийтийн албанд томилогдох эрхийг нь гурван жилийн хугацаагаар хасч, 27 сая төгрөгөөр торгох ял болгожээ.  Ингэж Ц.Нямдоржийн хүү болоод хуурай дүү Анхбаяр нарын хэрэг торгох ялаар төгссөн юм. Харин саяхан түүний хүү Н.Анхбаяр хэвлэлд энэ хэргийн талаар ярихдаа, “Олон жилийн өмнөх явдал. Зөндөө ярьсан. Гэхдээ одоо бодоход ёсзүйгүй үйлдэл гэдгийг би хүлээн зөвшөөрнө. Би тийм олон удаа хийгээгүй. Хоёр л удаа хийсэн. Тухайн үед би төрийн албанд байгаагүй. “Эрдэнэт”-д хөдөлгүүр нийлүүлсэн. Хэвлэлээр гараад байгаа шиг өндөр үнийн дүнтэй биш. 400-аад мянган долларын худалдан авах ажиллагаа байсан” хэмээн ярьсан юм.

Ийнхүү  хуульзүйн сайд Ц.Нямдоржийн хүү Н.Анхбаяр эцгийнхээ “Үгүйсгэж” байсан “Эрдэнэт” үйлдвэрт хийсэн шахааны талаар шулуухан хэлсэн нь нэг талаар шударга нэгэн мэт харагдах боловч нөгөө талаар Ц.Нямдорж гэдэг хүн монголд ямар их дархан эрхийг эдэлж буйг харуулсан гэхэд болно.

"Ардчилал таймс" сонин