Арчилсан залуучуудын холбоо 20 жилийн ойгоо тэмдэглэж эх орныхоо өнцөг бүрээс АЗХ-ны гишүүд цуглаж АНДУУД их чуулганаа өнгөрөгч долоо хоногт зохион байгууллаа.

Монгол улс ардчилсан тогтолцоонд шилжсэн энэ хугацаанд эрх чөлөөний дуу хоолой, үзэл санааны жигүүр болж ирсэн залуучууд өөрсдийн бодит оролцоотойгоор хөгжлийн шийдэл, гарцыг илэрхийлж “Үнэт зүйл, Сорилт” уриан дор чуулав. Чуулганд АН-ын удирдлагууд болон монгол дахь “Конрад Аденауер сан”-гийн суурин төлөөлөгч Йоханн Фурманн, “Зориг сан”-гийн зөвлөх С.Баяр, ҮБХ-ны гишүүд урилгаар оролцлоо.

Чуулганы зочин “Конрад Аденауер сан”-гийн суурин төлөөлөгч Йоханн Фурманн хэлэхдээ “Манай сан 26 жилийн турш Монголд үйл ажиллагаагаа явуулж байна. Бидний явуулж буй үйл ажиллагааны гол зорилго Монгол Улсад ардчиллыг бэхжүүлэх үйл явцыг дэмжихэд оршдог. Ардчилал Монгол Улсад тогтноход АЗХ-ны үүрэг, оролцоо маш их байгаа. Тийм ч учраас манай байгууллага тусалж дэмжин хамтарч ажилладаг. Улс төрийн шинэчлэлд ахмад, залуу үеийн харилцаа холбоо ямар чухал вэ гэдгийг мэдээсэй гэж хүсч байна” гэв.

Өнгөрсөн гурван жилийн хугацаанд Ардчилсан намын шинэчлэлийн хүрээнд үзэл баримтлалаа тодотгон баталгаажуулах олон үе шаттай ажлыг намын бодлогийн хүрээнд хийж гүйцэтгэхэд АЗХ-той хамтран ажиллажээ. 2019 оныг “Ардчилсан залуучуудын хөгжлийг дэмжих жил” болгон зарлаж  төв, бүсийн залуучуудын чуулган, үзэл баримтлалаа түгээн дэлгэрүүлэх, сурталчлах, ард түмэндээ таниулах сургалтуудыг үр бүтээлтэйгээр өрнүүлж, үргэлжлүүлж байгааг “АНДУУД” чуулган онцоллоо. 

Чуулганаар АЗХ өөрсдийн бодлогын хүрээнд хийж бүтээсэн ажлынхаа тайланг мөн танилцууллаа. Тухайлбал, хөгжлийн хөтөлбөрөөр сургалт, чөлөөт хэлэлцүүлэг хийж, “Эрх чөлөөгөө хамгаалья”, “Үндсэн хуулийн бус аргаар шүүх засаглалыг дээрэмдэж болох уу” тайван жагсаал зохион байгуулж холбогдох албан тушаалтанд шаардлага хүргүүлжээ. Мөн  байгаль орчин экологийн чиглэлээр “Бургас ажиллагаа” зохион байгуулан хууль бус газар олголтыг зогсоосон, эх, нярай нарт зориулж 100.000 живхийг 21 аймаг, 9 дүүрэгт хүргэсэн, “Шинэ давалгаа-Андууд” чуулган зэрэг ажлуудыг дурьдаж болох юм.

Харин энэ өдөр Ардчилсан залуус Монгол Улсад тулгамдаад хөгжлийн асуудлаар “Ядуурал сорилт болох нь”, “Инноваци, Аж үйлдвэрийн IV-р хувьсгал”, “Шуурганд зүггүй, Мананд чиггүй-Авлига, Хууль ёс”, “Пүүжээгийн эх орон-Утаа, уушги, уураг тархи”, “Аз жаргалтай өтлөхсөн-Нийгмийн даатгал”, “Улс төрийн намуудын санхүүжилт” сэдвүүдээр илтгэл тавьж гарцыг илэрхийлж хэлэлцүүлэг өрнүүлэв.

Мөн Монгол Улсад ардчиллын салхийг эхлүүлсэн, улс төр, нийгмийн нэрт зүтгэлтэн Санжаасүрэнгийн Зоригийн дурсгалыг мөнхлөн, үзэл санааг нь хүндэтгэн нэрэмжит шагналыг нь бий болгожээ.

С.Зоригийн нэрэмжит шагналд “Ардчиллын төлөөх шилдэг манлайлагч”, “Шилдэг Энтрепренер”,   “Иргэний нийгмийн шилдэг байгууллага” гэсэн гурван номинацид нэр дэвшүүлж шалгаруулсан байна.

Хамгийн анхны шагналыг АЗХ-ны үүсгэн байгуулагч, ардчилсан нийгмийн тулгуур зарчмууд, үнэт зүйлийг түгээн дэлгэрүүлэх, үйл хэргийг нь залгамжлах олон мянган манлайлагчдыг төрүүлсэн, тус холбооны анхны ерөнхийлөгч асан Г.Батхүүг хүндэтгэн олгож, гэр бүлд нь дурсгал болгон хүлээлгэж өглөө.

Чуулганд уригдсан “Зориг сан”-гийн зөвлөх С.Баяр “Дүү минь их богино насалсан. Энэ богино амьдралаа гэрэлт “Од” шиг харван өнгөрөөсөн. Дүүгийн минь нэрэмжит шагналыг бий болгосонд гэр бүл, “Зориг сан”-гийн нэрийн өмнөөс гүнээ талархаж байна. Түүний үйл хэрэг, үзэл санааг АЗХ, Монголын залуучууд нийгмийн сайн сайхны төлөө үргэлжлүүлэх ёстой. Олон зүйл хийж чадах гэрэл болсон залуучууд байгаад баяртай байна” гэв.

Эрх чөлөөний дуу хоолой, үзэл санааны жигүүр болсон “АНДУУД” 20 нас хүрлээ.

Ц.ТУЯА