УИХ-ын чуулганы өнөөдрийн хуралдаанаар Санхүүгийн зохицуулах хорооны дарга, Монголбанкны Ерөнхийлөгчийг нарыг чөлөөлөх тухай асуудлыг хэлэлцэж Н.Баяртсайхан, С.Даваасүрэн нарыг үүрэгт ажлаас нь чөлөөллөө. 

Монгол Улс ФАТФ-ын Саарал жагсаалтад орсонтой холбогдуулан дээрх байгууллагын удирдлагуудад хариуцлага тооцох шаардлага бий болсныг УИХ-ын дарга мэдэгдсэн. Үүнтэй холбоотойгоор СЗХ-ны дарга С.Даваасүрэн өөрийн хүсэлтээр чөлөөлөгдөх хүсэлтээ гаргасан бол УИХ-ын дарга Г.Занданшатар Монголбанкны ерөнхийлөгч Н.Баяртсайханыг огцруулах асуудлыг Их хуралд оруулсан юм.

Зарим эх сурвалжийн хэлснээр Монголбанкны Ерөнхийлөгч Н.Баяртсайхан үүрэгт ажлаасаа чөлөөлөгдөх хүсэлтээ УИХ-ын даргад хүргүүлж, түүний гаргасан хүсэлтийн дагуу чөлөөлөхөөр болжээ.  

Хуралдаанаар С.Даваасүрэнг өөрийн хүсэлтээр үүрэгт ажлаас нь чөлөөлөхийг гишүүдийн 60.5 хувь нь дэмжсэн бол Монголбанкны ерөнхийлөгч Н.Баяртсайханыг 57.1 хувь нь дэмжиж үүрэгт ажлаас нь чөлөөлөв. 

Хуралдааны үеэр дийлэнх гишүүн "Хоёрхон хүнийг ажлаас нь чөлөөлснөөр Саарал жагсаалтад орсон шалтгаан, нөхцөл тодорхой болохгүй. Харин үүний оронд Эдийн засгийн байнгын хорооны хаалттай хуралдаанаар Н.Баяртсайхан, С.Даваасүрэн нарын хэрхэн ажилласан тайланг сонсох хэрэгтэй" гэсэн байр суурь илэрхийлж байсан юм. Гэвч уг асуудлыг Байнгын хорооны хаалттай хуралдаанаар хэлэлцсэнгүй.

Үргэлжлүүлэн Оюутолгой ордын ашиглалтад Монгол Улсын эрх ашгийг хангуулах тухай УИХ-ын тогтоолын төслийг хэлэлцэж байна.