"Монголын Үндэсний фронт" хөдөлгөөнөөс цаг үеийн асуудлаар өнөөдөр мэдээлэл хийлээ.

Тус хөдөлгөөнөөс өнгөрөгч баасан гариг буюу энэ сарын 8-ны өдөр "Эх орон дуудаж байна" жагсаалыг Д.Сүхбаатарын талбайд зохион байгуулсан билээ. Гэвж жагсаалын маргааш өдөр нь болсон хөдөлгөөний Удирдах зөвлөлийн хурал дээр хөдөлгөөний тэргүүн, генерал Б.Баярмагнай нь фронтоос гарахаа мэдэгдэж, энэ тухай өөрийн фэйсбүүк хуудастаа бичсэн байдаг. Тус фронтод нэгдээд байсан хошууч генерал З.Болдбаатар мөн л "Үзэл бодол нэгдэхгүй байна" гэх шалтгаанаар фронтоос гарч байгаагаа мэдэгджээ.

Тиймээс "Монголын Үндэсний фронт" хөдөлгөөний удирдах зөвлөл өчигдөр буюу 11-ны өдөр хуралдаж, Б.Баярмагнай, З.Болдбаатар нарыг хөөх, хөдөлгөөний шинэ тэргүүнээр тоймч Ш.Гантулгыг томилох шийдвэр гаргажээ.

"Монголын Үндэсний фронт" хөдөлгөөний тэргүүн Ш.Гантулга:

-"Монгол Улсыг сөнөөж байгаа авлигач, "60 тэрбум"-ын болон "ЖДҮ"-ийн хэрэгтнүүдтэй тэмцэж, тэднийг Засгийн газрын ордноос хөөн гаргахын төлөө цорын ганц зорилгыг өвөрлөн "Монголын Үндэсний фронт" хөдөлгөөнийг байгуулсан. Фронт бол дайсантай хамгийн түрүүнд нүүр тулах цэг юм. Дайсантай нүүр тулахаас айсан хүмүүс гарч явлаа гээд хагарал гарлаа гэж хэлж болохгүй. Харин ч үнэнч шударга, зоригтой хүмүүс үлдлээ гэж ойлгох ёстой юм.

"Монголын Үндэсний фронт" хөдөлгөөнөөс зохион байгуулах дараагийн жагсаал арваннэгдүгээр сарын 15-нд зохион байгуулагдана. Улс орноо гэсэн сэтгэлтэй хэн бүхэн тэр жагсаалд ирээрэй" хэмээн хэллээ.