2019 оны арваннэгдүгээр сарын 11 буюу өчигдөр Төрийн албаны зөвлөл, Цагдаагийн ерөнхий газар хамтран таван сургууль дээр хяналт шалгалт хийж, тэрийн өндөр албан тушаалтнууд албаны унаагаараа хүүхдээ сургуульд нь зөөдөг үйлдлийг баримтжуулсан билээ. Албаны машиныг хувийнхаа хэрэгцээнд ашиглах нь бараг соёл шахуу болсон гэдгийг ЗГХЭГ-ын дарга нь өөрөө хүлээн зөвшөөрсөн байдаг.
Тэгвэл өчигдөр ТАЗ болон ЦЕГ-ын хамтарсан шалгалтад ЦЕГ-ын С.Баатаржав өөрөө бүдэрлээ. Монгол Оросын хамтарсан гуравдугаар сургууль дээр хүүхэд буулгасан албаны автомашинуудын нэг нь болох 01-00 УБЗ дугаартай Тоёота ланд 200 маркийн автомашин нь ЦЕГ-ын даргын албан хэрэгцээндаа ашигладаг машин болохыг Зариг.мн мэдээлжээ.
Төрийн албаны зөвлөл, ЦЕГ-ын Тээврийн цагдаагийн албатай хамтран "Орчлон" олон улсын сургууль, Монгол-Оросын хамтарсан гуравдугаар сургууль, Нэгдүгээр дунд сургууль болон British school, American school сургуулийн орчимд таван баг болж, төлөвлөгөөт бус шалгалт хийсэн бөгөөд төрийн албаны 28 машиныг хувийн зориулалтаар ашиглаж, хүүхдээ зөөсөн зөрчил илрүүлсэн байна.
Сургуулиудаар нь авч үзвэл Монгол-Оросын хамтарсан 3 дугаар сургууль дээр 16, "Орчлон" сургуульд 5, Нэгдүгээр дунд сургууль дээр 5, "British school"-д 1, "American school"-д нэг зөрчил гарчээ. Эдгээр нь төрийн албаны автомашин болохыг машины гэрчилгээгээр тогтоосон бөгөөд ТЕГ, УЕПГ, ЦЕГ, АТГ зэрэг хууль сахиулах байгууллагуудын албан хэрэгцээний машинууд ч энэ зөрчилд бүртгэгдсэн байна.
Сэтгэгдэл (35)