Инчеон хотын цагдаагийн газраас Үндсэн хуулийн Цэцийн дарга Д.Одбаяртай хамт явсан А-г Интерполын улаан жагсаалтад оруулж, эрэн сурвалжлахыг шаардсан байна.
Тэрбээр өмнө нь өөрийнх нь арын суудалд сууж явсан монгол иргэн ёс зүйгүй үйлдэл гаргасан. Тэр хүнтэй андуурагдаад байна гэсэн утгатай мэдэгдэл хийсэн нь одоогийн өгч буй мэдүүлэгтэй нь зөрчилдөж байгааг мөн эх сурвалжууд мэдээлжээ.
Өчигдөр Инчеон хотын цагдаагийн газарт Монгол Улсын Үндсэн хуулийн Цэцийн дарга Д. Одбаярын байцаалт 11 цаг орчим үргэлжилж, шөнийн 01.00 цагийн орчимд өндөрлөжээ. Д.Одбаяр нь Монголоос нисэхээс өмнө согтууруулах ундаа хэрэглэсэн байсан учир болсон үйл явдлыг санахгүй байна гэж мэдүүлсэн тухай Өмнөд Солонгосын хэвлэлүүд мэдээлсэн байна.
Мөн тэрбээр эхэндээ бүгдийг үгүйсгэж байсан ч байцаалтын явцад зарим нэг буруутай үйлдлээ хүлээн зөвшөөрсөн гэдгийг албан ёсны эх сурвалжууд мэдээлжээ. Гэхдээ яг ямар үйлдлээ хүлээн зөвшөөрсөн талаар тодорхой мэдээлсэнгүй. Түүнийг 10 хоног тус улсаас гарахыг хориглон, хэргийг үргэлжлүүлэн шалгахаар болсон байна. 
Гэрч, хохирогчдын мэдүүлснээр, Д.Одбаяр болон А нар нь тухайн өдөр согтууруулах ундаа хэрэглэсэн байсан ба Д.Одбаяр нь онгоцны ариун цэврийн өрөөний ойролцоо 20 орчим насны үйлчлэгч бүсгүйн гуянд хүрсэн бол А нь хэд хэдэн удаа шар айраг өгөхийг шаардан өөр нэгэн үйлчлэгч бүсгүйг мөрөөр нь тэвэрч бэлгийн дарамт учруулсан гэгдэж байгаа юм. Мөн Д.Одбаяр нь тухайн үед шаардлага тавьсан нисэх багийн ажилтныг хана руу түлхэж, орчуулга хийхээр ирсэн KAL-ын ажилтан монголын иргэн Б-г “Намайг ҮХЦ-ийн дарга гэдгийг мэдэх үү. Шууд орчуулаадах. Чи хаана амьдардаг юм. Би чамайг монголд очоод зүгээр өнгөрөөхгүй” гэх мэтээр сүрдүүлсэн гэсэн мэдээллүүд байна.
Харин түүнтэй хамт явсан А-ийн хувьд түүнийг баривчлах шийдвэр гарчихсан, БНСУ-ын хилээр орж ирсэн даруйд баривчлан саатуулж, мөрдөн байцаах ажиллагааг эхлүүлэхээр хүлээж байна. БНСУ-ын зүгээс энэ хэрэг дээр Сөүл дэх Монгол Улсын элчин сайдын яамтай хамтран ажиллахаар болжээ.
Мягмар гаригаас эхлэн Өмнөд Солонгосын хэвлэл мэдээллүүд Монгол Улсын Цэцийн даргатай холбоотой дуулианыг гадаад хэл дээрх сувгуудаараа цацаж эхлээд байна.
БНСУ-ын олон нийтийн телевиз KBS гадаад хэл дээрх сувгуудаараа Д.Одбаяр даргатай холбоотой мэдээнүүдийг цацаж эхэлсэн бөгөөд KBS Radio сувгийн Испани, Франц, Вьетнам хэл дээрх сайтууд уг хэргийн талаар мэдээлсэн байна. Мөн тус улсын англи хэл дээр гардаг өдөр тутмын сонин "Korea Times" энэ хэргийн талаар мэдээлжээ.
