Удаан хугацаанд олны нүд, чихнээс нуугдаж явсан нэр нөлөөтэй эрхмүүд ээлж дараалан "хэлд орж" эхэллээ.

Сангийн сайд асан С.Баярцогт өнөөдөр хэвлэлийн бага хурал зарлаж, Оюутолгойн хөрөнгө оруулалтын гэрээний түүхийг "хүүрнэн өгүүлсэн" ном бичсэн тухай зарласан. Гэтэл Ерөнхий сайд С.Баяр ч бас түүнтэй утга нэг мэдээллийг олон нийтийн сүлжээнд тавьсан байна. Өөрөөр хэлбэл, "долдугаар сарын 1"-ний хэргийн талаар ном бичсэн тухайгаа өөрийн твиттер хуудсаар жиргэжээ. 

Ерөнхий сайд асан энэхүү номдоо "нууц", "маш нууц", "онц чухал нууц" ангиллын баримтуудыг ашиглажээ.

Тэр энэ тухайгаа "Энэ үдэш би "долдугаар сарын 1" гэдэг номоо бичиж дуусгалаа. Яаж хэвлүүлэх вэ? Сая хуудаслан тоолов. Тэгтэл 60 хувь нь "нууц", "маш нууц", "маш нууц-онц чухал" тамгатай баримт ашигласан байна. Уг нь нууцлаад байх сүртэй юм алга. "7 сарын 1"-ний үйл явдлыг нууцлах биш, дэлгэх ёстой. Ийм үймээн дахин гарвал Монголын төр яах ёстой, яах ёсгүй гэдгээ мэдэх, тогтоох үүднээс. Хэн нэгнийг буруутгах, өөрийгөө зөвтгөх юм би бичээгүй. Үйл явдлын дараалал, төрийн удирдлагуудын үг, үйлдэл, үр дүнг баримтаар бичлээ. Тэргүй бол уран зохиол болно" хэмээн жиргэсэн байна.