УИХ дахь АН-ын зөвлөлийн өнөөдрийн хуралдаанаар, Монгол Улсын Үндсэн хуульд оруулах нэмэлт өөрчлөлтийн төслийг гуравдугаар хэлэлцүүлэгт бэлтгэх ажлын багт гурван зарчмын санал хүргүүлсэн тухай мэдээллээ. 

Тодруулбал, Ерөнхийлөгчийг парламентаар сонгох, сонгуулийг холимог тогтолцоогоор явуулах, Ерөнхий сайд танхимаа өөрөө бүрүүлэх эрхийг Үндсэн хуулиар нээх гэсэн зарчмын гурван саналыг илэрхийлж байна. "Тэдгээрийг хүлээн авсан тохиолдолд Үндсэн хуулийн нэмэлт, өөрчлөлтийн төслийн хэлэлцүүлэгт УИХ дахь АН-ын зөвлөл оролцоно" гэж тус зөвлөлийн дарга Д.Эрдэнэбат мэдээллээ. 

Д.Эрдэнэбат:

-"Үндсэн хуулийн нэмэлт, өөрчлөлтийн төслийн хоёрдугаар хэлэлцүүлгийн дараа Ерөнхийлөгч Ард нийтийн санал асуулга явуулах УИХ-ын 73 дугаар тогтоолд хориг тавьж, УИХ хүлээн авснаар тус тогтоолыг хүчингүйд тооцсон. Улмаар УИХ-аас Үндсэн хуулийн нэмэлт, өөрчлөлтийг гуравдугаар хэлэлцүүлэгт бэлтгэх тогтоол гаргасан. Энэ тогтоолын цаад санаа нь Ард нийтийн санал асуулга явуулахгүй, УИХ дангаараа Үндсэн хуулийн нэмэлт, өөрчлөлтийг батална гэж байгаа юм. Энэ долоо хоногт чуулган түр завсарлаж, 11 дүгээр сараас гуравдугаар хэлэлцүүлэгт бэлтгэх ажилдаа орох бололтой.

Энэ хугацаанд зөвшилцлийн ажлын баг ажиллана. УИХ-ын 73 дугаар тогтоол хүчингүй болсноор, хоёрдугаар хэлэлцүүлгийг задалж хэлэлцэх боломжтой гэдэгт эрх баригчид санал нэгдэхгүй байна. Хоёрдугаар хэлэлцүүлгээ эцэслэхгүйгээр гуравдугаар хэлэлцүүлэгт орвол, хуулийн төсөл батлагдсаны дараа Үндсэн хуулийн Цэцэд маргаан үүсэх нөхцөл гарч мэднэ. УИХ дахь АН-ын зөвлөлөөс иргэдийн хүсэн хүлээсэн Үндсэн хуулийн нэмэлт, өөрчлөлтийг батлахын төлөө тууштай байх болно" гэв.