Нийслэлийн прокурорын газрын хяналтын прокурор Д.Эрдэнэсувдын өнөөдөр мэдээлснээр Салхитын мөнгөний ордтой холбоотой нэр бүхий зургаан шүүгчийн хэрэг, Онцгой байдлын ерөнхий газрын даргаар ажиллаж байсан албан тушаалтанд холбогдох хэрэг, Хөгжлийн банкны захирал асан албан тушаалын байдал, эрх мэдлээ урвуулан ашигласан гэх хэргүүдийг прокурор хянаж байна.

Харин Ховд аймгийн байгалийн цогцолбор газарт нөхөн сэргээлт хийх нэрийдлээр ашигт малтмалыг хууль бусаар олборлож байсан "Өгөөжтэй Өв" ХХК, "Бэлон" ХХК-ийн захирлуудад холбогдох хэргийг хянаад нэмэлт ажиллагаа хийлгэхээр өчигдөр буюу 2019 оны аравдугаар сарын 23-нд Авлигатай тэмцэх газарт буцаажээ.

Дараах хэргүүдэд яллах дүгнэлт үйлдэн шүүхэд шилжүүлсэн байна.  

-УИХ-ын гишүүн, ХХААХҮ-ийн сайдаар ажиллаж асан, Б.Батзориг болон тус яамны Төрийн нарийн бичгийн дарга, ЖДҮХС-гийн захирал асан, Монголбанкны захирал асан Н.Золжаргал нарын албан тушаалын байдлаа урвуулан ашигласан хэрэг, 

-Нийслэлийн нийтлэг үйлчилгээний газрын албан тушаалтнууд бүлэглэн удаа дараагийн үйлдлээр албан тушаалын байдлаа урвуулан ашиглаж их хэмжээний хохирол учруулсан хэрэг,

-Дуучин Б.Амархүүд холбогдох мансууруулах болон сэтгэцэд нөлөөлөх бодисыг түүж бэлтгэн бусдад худалдсан гэх хэрэг,

-Эрүүгийн цагдаагийн газрын Эдийн засгийн гэмт хэрэгтэй тэмцэх газраас шалгасан Нигер улсын хоёр иргэн бусадтай хамтран аж ахуйн нэгж байгуулах нэрийдлээр бусдаас их хэмжээний евро, доллар залилсан, мөнгө угаасан хэрэгт прокуророос яллах дүгнэлт үйлдэн шүүхэд шилжүүлжээ.

Харин С.Баяр, С.Баярцогт нарт холбогдох хэрэг прокурорын хяналтад ирсэн, хянагдаж байна гэв.