Монгол Улсыг Саарал жагсаалтад оруулах эсэх талаар ФАТФ-ын Парис хотод болж буй хурлаараа хэлэлцсэн. УИХ-ын гишүүн, АН-ын дарга С.Эрдэнэ өнөөдөр үдээс хойш энэ тухай "Монгол Улс саарал жагсаалтд орсон тухай мэдээллийг дөнгөж сая авлаа. Албан ёсны мэдээлэл нь удахгүй цацагдах байх" гэсэн билээ. 

Тэгвэл яг энэ асуудлаар Монголбанкны Дэд ерөнхийлөгч Б.Лхагвасүрэн дөнгөж сая мэдээлэл хийлээ. Тэрээр энэ тухай, "Саарал жагсаалтад Монгол Улс орох эсэх албан ёсны хариуг баасан гарагт зарлана. Саарал жагсаалтад орлоо гэхэд олон улсын байгууллагуудын хамтын ажиллагаа зогсохгүй. Харин хамтран ажиллахад эрсдэлтэй л гэж үзнэ. Энэ үйл явц 2016 оноос хойш үргэлжилж байна, бид үнэлгээгээ сайжруулахаар тасралтгүй ажиллаж ирсэн. 

ФАТФ-ын техникийн 40 зөвлөмжийг дөрвөн янзаар үнэлдэг. Энэ хугацаанд 2017 оны үнэлгээ болон 2019 оны хувьд:

2017 оны 40 зөвлөмжийн тухайд,

-5 нь хангалтгүй  

-15 нь зарим нь хангалтгүй 

-5 нь дийлэнх нь хангагдсан 

-5 нь бүрэн хангасан гэсэн үнэлгээ авч, 40 зөвлөмжөөс 20 нь хангалтгүй байсан бол

өнгөрсөн наймдугаар сард Австралийн нийслэлд болсон Ази, Номхон далайн бүсийн хурлаар 

-7 нь бүрэн хангасан

-28 нь дийлэнх нь хангасан 

-5 нь зарим нь хангасан буюу 40 зөвлөмжөөс 35 хангасан гэсэн албан ёсны дүн гарсан. 

Зөвлөмжийг хэрэгжүүлсэн 11 үзүүлэлтийн тухайд 2017 онд 

-Муу 9

-Дунд 2 буюу бүгд дундаас доош үнэлгээтэй байсан бол өнгөрсөн сард Бангкокт болсон хурлаар 

-Сайн 7

-Дунд 4 буюу хэрэгжилт сайн явж байна гэж үзсэн. Ингээд хийсэн ажлаа харвал Саарал жагсаалтад Монгол Улс орохооргүй байгаа юм. Хурлын эцсийн шийдвэрийг баасан гаригт олон нийтэд албан ёсоор зарлана. Одоо л энэ албан ёсоор зарлагдах гэж байгаа болохоос 2017 онд аль хэдийн дохио ассан байсан" гэв.