Олимпийн хүрэл медальт, дэлхийн аварга, Монгол Улсын хөдөлмөрийн баатар Х.Цагаанбаатар өчигдөр орой “Боловсрол суваг” телевизийн “Гурван сая инээд” шоу нэвтрүүлэгт оролцлоо. "Эхлээд шагналаа авчихаад дараа нь зорилгоо хэлнэ ээ" хэмээн даруухан эхэлсэн тамирчин маань 500 мянган төгрөгийн шагналтай III үеийн тоглолт дээр минут нь дуусах гээд сандарч, "Батаа, онигоог чинь ярина шүү" гэж байж шүүгчдийг инээлгэв.

Дөрөвдүгээр үе хүртэл амжилттай тоглож сая төгрөгийн эзэн болсон Цагаанаа шагналын сая төгрөгөө БНСУ-д эмчлүүлж буй сэтгүүлч Ж.Жаргалсайханд хандивлалаа. Түүний нэвтрүүлэгт оролцсон зорилгыг сонсоод сэтгэл нь хөдөлсөн хөтлөгч Г.Анхбаяр, шүүгч М.Баярмагнай, Д.Баттөмөр нар аваргын сайн санааны үйлсийг дэмжиж тус бүр 100 мянган төгрөгийн хандив өргөв. Бөөрны дутагдлаар БНСУ-д эмчүүлж буй сэтгүүлч бүсгүйн нөхөр аваргатай хамт бэлтгэл хийдэг байсан спортын найзууд юм байна.

Хэрвээ Цагаанаа аварга зорилгодоо хэт төвлөрөөд цагаа байн байн харж, хэтэрхий хурдан хурдан яриагүйсэн бол дахиад нэг үе тоглож, 3000.000-ын эзэн болох бүрэн нөөцтэй орж ирсэн байлаа. Сайн сэтгэлийнх нь үр үргэлжид дэлгэрч явах болтугай. 

Б.ЗАЯА