УИХ-ын чуулганы өнөөдрийн хуралдаанаар ЗХЖШ-ын даргыг томилох асуудлын талаар Ерөнхийлөгчөөс ирүүлсэн саналыг зөвшилцөв.

ЗХЖШ-ын даргаар ажиллаж байсан А.Ганбат эрүүл мэндийн шалтгаанаар үүрэгт ажлаа өөрийн хүсэлтээр хүлээлгэн өгсөн тул Ерөнхийлөгч хуульд заасан бүрэн эрхийнхээ хүрээнд Довчинсүрэнгийн Ганзоригийг ЗХЖШ-ын даргаар томилох асуудлыг зөвшилцөх тухай албан бичгийг энэ сарын 1-нд УИХ-д хүргүүлсэн байна.

Ерөнхийлөгчийн саналыг чуулганы хуралдаанд оролцсон гишүүдийн 76.9 хувь дэмжлээ. Энэ үеэр УИХ-ын гишүүд зэвсэгт хүчний сахилга батыг сайжруулах, цэргүүд нас барсан хэргийг судлан шийдвэрлэхийг нэр дэвшигчид захилаа. УИХ нэр дэвшигчийг дэмжсэн Ерөнхийлөгч зарлиг гаргаж ЗХЖШ-ын даргыг томилно.

Д.Ганзориг нь 48 настай, 1980-1990 ЗХУ-ын 8 дугаар дунд сургууль, 1990-1995 онд ОХУ-ын Тамбов хотын Цэргийн дээд сургууль, 1999-2000 онд БНХАУ-ын Тусгай хүчний сургууль, 2001-2002 онд АНУ-ын Явган цэргийн офицерын дамжаа, 2007-2008 онд АНУ-ын Команд штабын коллеж, 2011-2012 онд АНУ-ын Армийн дайны коллежийг тус тус төгссөн.

Тэрбээр 1995-1997 онд Зэвсэгт хүчний 119 дүгээр ангийн салааны захирагч, 1997-2002 онд Зэвсэгт хүчний 150 дугаар ангид албаны дарга, сургагч багш, 2002-2003 онд Зэвсэгт хүчний 311 дүгээр ангид Энхийг дэмжих сургалтын төвийн орлогч дарга, 2003-2007 онд Зэвсэгт хүчний жанжин штабт мэргэжилтэн, 2008-2010 онд Зэвсэгт хүчний 311 дүгээр ангид Энхийг дэмжих ажиллагааны сургалтын төвийн дарга, 2010-2011 онд ҮАБЗ-ийн ажлын албанд референт, 2012-2014 онд Зэвсэгт хүчний жанжин штабт газрын орлогч дарга, 2014 оноос Зэвсэгт хүчний жанжин штабын Ажиллагааны удирдлагын газрын даргаар ажиллаж байна.