УИХ-ын Төрийн байгуулалтын байнгын хороо хуралдаж байна.
Байнгын хороогоор Үндсэн хуулийн нэмэлт, өөрчлөлтийн төслөөр ард нийтийн санал асуулга явуулах товыг хэлэлцэж байна. УИХ дахь МАН, АН-ын бүлгүүд өнгөрөгч долоо хоногт АНСА явуулахыг дэмжсэн билээ.
Харин санал асуулга явуулах төсвийг Засгийн газраас нөөц сангаас гаргахаар төлөвлөсөн ч Засгийн газрын хэрэг эрхлэх газрын дарга Л.Оюун-Эрдэнэ "Засгийн газрын нөөц сангийн үлдэгдэл АНСА-д хүрэлцэхгүй" гэжээ. Тиймээс АНСА-ыг зохион байгуулах зардлыг төсвийн тодотголоор хийх саналыг гишүүд гаргасан байна.
Өнгөрөгч бямба гаригт УИХ дахь МАН-ын бүлгийн дарга Б.Тогтохсүрэн, ТББХ-ны дарга С.Бямбацогт нар мэдээлэл хийхдээ "АНСА явуулах зардалд Ерөнхийлөгчийн сонгуультай ойролцоо хэмжээний мөнгөн хөрөнгө шаардлагатай" хэмээн мэдэгдсэн. Тэгвэл 2017 оны Ерөнхийлөгчийн сонгуульд 14.9 тэрбум төгрөг зарцуулсан байна.
УИХ дахь МАН-ын бүлгийн дарга Д.Тогтохсүрэн АНСА-ыг аравдугаар сарын сүүлээр буюу аравдугаар сарын 23, 24-нд зохион байгуулах санал гаргаж, Сонгуулийн Ерөнхий Хороо үүнийг нь дэмжсэн байна.
