Тагнуулын ерөнхий газрын дарга асан, генерал Б.Хурцыг үргэлжүүлэн хорих саналыг Чингэлтэй дүүргийн Эрүүгийн хэргийн анхан шатны шүүхэд өнөөдөр хэлэлцэж, 15 хоног хорих шийдвэр гаргажээ.

Түүнийг С.Зориг агсны хэргээр ял эдэлж буй Т.Чимгээ, Б.Содномдаржаа нарыг эрүүдэн шүүсэн асуудалтай холбогдуулан энэ сарын 23 -ны орой хойшлуулашгүй ажиллагаа явуулж баривчлан, ШШГЕГ-ын харьяа 461 дүгээр хорих ангид цагдан хорьсон юм.

АТГ-ын Мөрдөн шалгах хэлтсийн дарга Ч.Жаргалбаатар: "ТЕГ-ын дарга асантай холбоотой асуудлаар 2018 оны арван хоёрдугаар сард нийслэлийн Прокурорын газраас хэрэг бүртгэлтийн хэрэг нээж, харьяалал тогтоон манайд ирүүлсэн. АТГ-ын мөрдөн шалгах хэлтсээс мөрдөн шалгалтын ажиллагаа явуулж байх хугацаанд буюу өнгөрөгч долоо хоногийн баасан гаригт нийслэлийн Прокурорын газраас хэргийг татаж хянаад ЦЕГ-ын Мөрдөн байцаах албанд шилжүүлсэн" гэсэн юм.