“Эрдэнэт” үйлдвэрийн ТУЗ-ын гишүүн М.Мөнхбаатар Эрүүгийн цагдаагийн газарт мэдүүлэг өгөхөөр ирэх үеэрээ сэтгүүлчдийн асуултад хариулт өгснийг тоймлон хүргэе.
Эрүүгийн цагдаагийн газраас дуудсаны дагуу өнөөдөр би энд ирээд байна. Урьд нь намайг эрүүгийн цагдаа болон АТГ-аас хэд хэдэн удаа дуудсан. ЗГХЭГ-ын дарга Л.Оюун-Эрдэнэ өчигдөр хуулийн байгууллагуудад үүрэг өгсөн. Тэгэхээр өчигдөр хийсэн тавилттай мэдээллийн дагуу өнөөдрийн үйл явдал өрнөж байна гэж ойлгож байгаа. Хуулийн байгууллага хараат бусаар ажиллах ёстой. Тэгж ажиллана гэж найдаж байна. Өнөөдөр бид Монгол улсын хууль тогтоомжийг зөрчсөн зүйл байхгүй. Манай компанийн зүгээс ямарваа нэгэн байдлаар улсаас мөнгө аваагүй. 400 сая доллар аваагүй гэдгийг албан ёсоор дахиж хэлье. Л.Оюун-Эрдэнэ гишүүний хэлсэнчлэн төрөөс мөнгө авсан уу, үгүй юу гэдэг 49 хувийн схемийн талаар сүүлийн хоёр жил шалгаж байгаа. Түүнээс биш бид материалаа нуугаад зугтаад байгаа зүйл байхгүй. Би гэрчээр дуудагдаж, мэдүүлэг өгөхөөр дөрөв таван удаа ирсэн. Ц.Пүрэвтүвшин захирлын хувьд түүнээс олон удаа ирсэн байх. Бид бүхэн санхүүгийн мэдээллээ бүгдийг нь төрийн байгуууллагад гаргаж өгсөн. Манай компани төрөөс мөнгө аваагүй гэдгийг баталсан Сангийн яам, Хөгжлийн банк, Монгол банкны албан тоотууд бий Энэ бичгийг бид олон нийтийн мэдээллийн хэрэгслээр тараана. Өнөөдрийн болж байгаа процесс бол манай компанийн эсрэг системтэйгээр явуулж байгаа үйлдэл.
Нууцаас гаргасан баримтууд хоёр жилийн өмнө ил болсон
Бид Худалдаа хөгжлийн банктай зээлийн харилцаатай. Тэр банкнаас зээл авсан. Энэ зээлийн гэрээ сайтуудад байгаа. Эрдэнэбилэг гэдэг хүн Худалдаа хөгжлийн банкны ТУЗ-ын дарга. Өнөөдрийн байдлаар зээл өгсөн байгууллага нь буруудаад явж байгаа юм шиг байна. Төрийн байгууллага үнэн зөв шударгаар ажилладаг бол нэг хоёр хоногийн дараа тодорхой болох байх. Л.Оюун-Эрдэнэ гишүүний нууцаас гаргасан гээд байгаа зүйлс хоёр жилийн өмнө ил болсон шүү дээ. Тэгэхээр ямар нэг зүйлийг далдлах зорилгоор ийм мэдээлэл албаар хийж байна гэж бид хардаж байгаа. Эрдэнэтийн 51 хувьтай холбоотой шүүх хурал удахгүй болох гэж байгаа гэсэн мэдээлэл бий. Түүнийг дарахын тулд өнөөдрийн үйл явцыг явуулж байгаа юм биш үү гэсэн хардлага надад байна. Жижиг дунд үйлдвэрлэлтэй холбоотой асуудал байна. Нэр холбогдсон хүмүүс тэр үйлдлээ дарахын тулд үүнийг хийж байгаа юм болов уу гэсэн хардлага надад байна.
Эрдэнэтийн 49 хувь буцаад Ростехийн мэдэлд очих эрсдэл бий
Эрдэнэт үйлдвэр Стандарт банкинд өрөнд орчихоод байна. Энэ бол 51 хувьтай холбогдох асуудал. Мөн өчигдөр “Цензургүй яриа” нэвтрүүлгийн үеэр Эрдэнэт үйлдвэрийг Арбитрын шүүхэд ялагдах нөхцөлд биднийг оруулсан гэж байсан. Гэтэл 2016 оны таван сард Стандарт банкны арбитрын шийдвэр гарчихсан. Арбитрын хурал нь 2013 оноос эхлээд явж байсан. Манай компани 2016 оны зургаан сарын сүүлээр хувьцаа эзэмшигч болсон. Тэгэхээр бидний оролцоогүй Стандарт банкны шийдвэр гараад явсан гэсэн үг. Тэгэхээр эрх баригч нам 51 хувийн асуудлаас анхаарлыг сарниулах оролдлогыг хийж байна. Татварт төлөх ёстой байсан мөнгө маань Стандарт банк руу явах гэж байна. Манай компанийн зүгээс хэд хэдэн удаа Стандарт банкны асуудлаар төрийн гурван өндөрлөгт хандаж байсан. Хариу өгөөгүй. Бид 49 хувийн гэрээнд гарын үсэг зурахдаа гурван жилийн хугацаанд гуравдагч этгээдэд худалдахгүй гэсэн гарын үсэг зурсан. Зарах гэсэн бол хэзээ ч ийм нөхцөлд гарын үсэг зурахгүй байсан. Монгол Улсын Засгийн газар 49 хувийг авах гэж байна гээд байгаа. Гэтэл бидний Ростехтэй хийсэн гэрээ хүчин төгөлдөр бус болох юм бол Эрдэнэтийн 49 хувь буцаад ОХУ-ын Ростех компанийн мэдэлд очно.
Б.Наранчимэг "Ардчилал таймс" сонин
