БОУАӨ-ийн сайд Ц.Сандаг-Очир "Туулын хурдны замын" төслийг түр зогсоож байгаагаа шөнө дунд зарласнаас хойш хоёр хоног өнгөрлөө. Шинээр байгуулагдсан Засгийн газрын тэргүүн Н.Учрал өчигдөр болсон ээлжит хуралдаанаараа “Шаардлагатай бол зарим мега төслийг зогсооно” гэдгээ ч хэлээд амжсан.

Тэгвэл зарим эх сурвалжийн мэдээлснээр Туулын хурдны зам ч биш хотоос хэрэгжүүлж байгаа таван том төслийг зогсоох гэж байгаа сурагтай. Тухайлбал, замын түгжрэлийг бууруулах трамбай, эрчим хүчийг нэмэх ТЭЦ-5 төслийг зогсоох яриа гарч эхэлжээ.

Өнгөрсөн нэгдүгээр сард 4-р станцад гэмтэл гарч хот хөдлөхөө шахсан. Тухайн үед цахилгаан станц шиг хэрэгтэй зүйл алга гээд өмнөх Ерөнхий сайд Г.Занданшатар хотын даргаа дагуулаад ТЭЦ-5 барих байршилд ажиллаж байсан нь саяхан. Гэвч монголд төрийн залгамж халаа байдаггүйн тод жишээ болж ТЭЦ-5 станц барих, трамбай байгуулах ажлыг зогсоох бололтой.

Энэ мэтээр тун хэрэгтэй төслүүдийг Ойрхи Дорнодын дайнаар далимдуулан зогсоож байгаагийн цаад шалтгаан нь эрх баригч намын дотоод тэмцэл хурцадсантай холбон ярих хүмүүс ч байна.