МАН-ын дарга, УИХ-ын дарга Н.Учрал Хятадын Коммунист намын урилгаар БНХАУ-д энэ сарын 22-24-нд айлчилж байна.

Айлчлалын хүрээнд Бээжингийн робот үйлдвэрлэлийн паркийн үйл ажиллагааг өнөөдөр үзэж сонирхов. Бээжин нь дэлхийн роботын хэрэглээний тэргүүлэгч хот болох зорилтынхоо хүрээнд Дашин дүүргийн И-Жуан эдийн засаг, технологийн хөгжлийн бүсэд олон улсад тэргүүлэх ухаалаг роботын үйлдвэрлэлийн загвар парк байгуулжээ.

Парк нь роботтой холбоотой бүх түвшний технологийн дэвшил, хэрэглээний орчинд зориулсан загвар, туршилтын чиглэлийг төвлөрүүлж, роботын үйлдвэрлэлийн экосистемийг бүрдүүлж, чухал эд ангиуд болон үйлдвэрлэлийн гинжин холбоог бий болгосон байна.

Одоогоор тус паркт хүн хэлбэрийн, эмнэлгийн, тусгай зориулалтын робот, роботын эд анги зэрэг салбарын 100 гаруй компани төвлөрөөд байгаа аж. Тус парк дотоодын зах зээлд худалдаалах бүтээгдэхүүнээ хятад хэлний горимоор, экспортын бүтээгдэхүүнээ хятад болон англи хэлний горимоор үйлдвэрлэдэг байна.

Тус паркийн Бээжингийн анхны роботын үзүүлэнгийн төвд дэлхийн анхны биежсэн ухаалаг роботын 4S дэлгүүр болох “Роботын ертөнц”, Хятадын анхны роботын сэдэвтэй орчин үеийн ресторан болох “Роботын гал зуух”, Үндэсний роботын шалгалт, үнэлгээний төв, роботын үйлдвэрлэлийн инкубатор, роботын хоёрдогч хөгжүүлэгчдийн нийгэмлэг зэрэг нийслэл болон улсын хэмжээний аж үйлдвэрийн инновацын платформ нэгдсэн байна. Ингэснээр Бээжингийн аж үйлдвэрийн хөгжлийг дэмжих гол төв болжээ.

Улмаар парк нь Бээжингийн роботын үйлдвэрлэлийн хүчийг олон улсад танилцуулах чухал цонх болж, биежсэн ухаалаг технологийн судалгаа, хөгжүүлэлтээс хэрэглээнд нэвтрүүлэх бүх процессыг үзүүлж, олон улсын хамтын ажиллагаа, технологи солилцоог дэмжих үр дүнтэй индэр болсон байна.