Өнгөрөгч оны сүүлийн өдөр хуралдсан Засгийн газрын хуралдаанаас “Эдийн засгийг эрчимжүүлэх 300 хоногийн төлөвлөгөө” баталсан. Өөрөөр хэлбэл, танхимын тэргүүн Засгийн газрынхаа ажиллах хугацааг хамгийн багадаа 300 хоногоор төсөөлжээ гэсэн үг. Тоолуур гүйгээд эхэлсэн...

Төлөвлөгөөний хүрээнд иргэдийн орлогыг бодитой нэмэгдүүлэх, хүний хөгжлийг дэмжих, бизнесийн боломж, эрх чөлөөг нэмэгдүүлэх, хэмнэлттэй, хариуцлагатай, хяналттай төрийн реформыг хэрэгжүүлэх, сөрөн тэсвэрлэх чадавх, эдийн засгийн хувьсгалыг хэрэгжүүлэх 88 зорилт, 141 арга хэмжээ тусгасан байна.

Өнгөрөгч даваа гаригт Ерөнхий сайд Г.Занданшатар аймаг, нийслэлийн ИТХ-ын дарга болон Засаг дарга нартай цахимаар хуралдаж, 300 хоногийн төлөвлөгөөг танилцуулан, хэрэгжүүлэх ажилд санаачилгатай оролцохыг үүрэг болгосон.  Лхагва гаригт хуралдсан Засгийн газрын ээлжит хуралдаанаас Тавантолгойн бүлэг ордод багтах Бортээгийг ордыг эдийн засгийн эргэлтэд оруулах, хөрөнгө оруулагчдыг сонгон шалгаруулах ажлын хэсгийг байгуулсан.

Мөн өдөр Төрийн өмчийн бодлого зохицуулалтын газрын дарга Б.Цэнгэл энэ онд хувьчлалд оруулах 33 компанийг нэрлэв. Нэмэлт хувьцаа гаргаж, биржээр нээлттэй арилжаалах 18 компанийн жагсаалтад “Эрдэнэс Тавантолгой”, “Эрдэнэт” үйлдвэр, “МИАТ”, “Монголын цахилгаан холбоо” компаниуд орсон байна.

Өнгөрөгч оны төгсгөлд Засгийн газар Татварын ерөнхий хуульд нэмэлт, өөрчлөлт оруулах тухай хуулийн төслийг өргөн барьсан. Аж ахуйн нэгжийн орлогын албан татварын тухай, Нэмэгдсэн өртгийн албан татварын тухай, Хувь хүний орлогын албан татварын тухай хуульд нэмэлт, өөрчлөлт оруулах замаар нийт 2.8 их наяд төгрөгийг хөнгөлөлт, чөлөөлөлтийг хийхээр болсон. Ингэснээр татварын орлого 2,8 их наядаар буурах ч энэ мөнгө иргэд, аж ахуйн нэгжүүдийн халаасанд зузаатгал болж үлдэнэ гэсэн үг. Хаврын чуулганаар хэлэлцэнэ.

Түүнчлэн УИХ-ын дарга Н.Учралын Эдийн засгийн хөгжлийн сайдаар ажиллаж байхдаа өргөн барьсан Зөвшөөрлийн тухай хуулийн нэмэлт, өөрчлөлтийн төсөл УИХ-ын хэлэлцүүлэгт ороод явж байгаа. Эдийн засгийн эрх эрх чөлөөнд хүндрэл үүсгэж байгаа 228 хууль, эдийн засгийн эрх, эрх чөлөөг шууд зөрчиж байгаа 110 хууль байгааг илрүүлж, холбогдох хуулиудад нэмэлт өөрчлөлт оруулахаар болсныг хууль санаачлагч танилцуулсан.

Гэх мэтчилэн Г.Занданшатарын Засгийн газар эдийн засгаа эрчимжүүлэх, эдийн засагт үзүүлж буй төрийн оролцоог бууруулах, хувийн хэвшлийг дэмжих, хөрөнгө оруулалтыг нэмэгдүүлэх, татварын дарамтыг бууруулах чиглэлээр тавьсан зорилгынхоо араас явж эхэллээ. Гэвч гадна талд нөхцөл байдал хүндхэн байна. Ахмадын тэтгэврийг 80 мянган төгрөгөөр нэмэгдүүлсэн нь чамлагдаж, шатахууны хомсдол, үнийн өсөлтөөс болж иргэд бухимдалтай хэвээр. Ирэх долдугаар сард тэмдэглэх Их Монгол Улсын 820 жилийн ой хүртэл тэсч чадвал улсаараа жаахан "нар үзчих гээд" байдаг...