Монгол Улсын Их Хурлын намрын ээлжит чуулганы өнөөдрийн нэгдсэн хуралдааны хэлэлцэх асуудлуудыг танилцууллаа. Хуралдаан арван цагт “Их хуралдай” танхимд эхлэх бөгөөд энэ өдөр улсын хөгжлийн бодлогоос эхлээд олон нийтийн эрүүл мэндийн асуудал хүртэл хэд хэдэн томоохон төслийг хэлэлцэхээр төлөвлөжээ.

Засгийн газраас арван нэгдүгээр сарын гучинд өргөн мэдүүлсэн Монгол Улсыг хоёр мянга хорин зургаан – хоёр мянга гучин онд хөгжүүлэх таван жилийн үндсэн чиглэлийг батлах тухай тогтоолын төслийн анхны хэлэлцүүлгийг хийж, улсын хөгжлийн стратегийн зорилтууд болон хэрэгжүүлэх бодлогын хүрээг тодорхой хэлэлцэнэ. Энэхүү баримт бичиг нь улс орны дундаж хугацааны бодлогын суурь баримт болдог учраас УИХ-ын гишүүдийн анхаарал татаж буй гол асуудлын нэг юм.

Мөн УИХ-ын гишүүн О.Номинчимэг нарын далан найман гишүүнээс санаачлан өргөн мэдүүлсэн Тамхины хяналтын тухай хуульд нэмэлт өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслүүдийг хэлэлцэх эсэхийг тогтооно. Энэ хүрээнд хоёр цагийн турш асуулт, хариултын хэлбэрээр гишүүд бодит үр нөлөө, нийгмийн эрүүл мэндийн ач холбогдол, хуулийн хэрэгжилтийн асуудлыг хэлэлцэх юм.

Тамхины хэрэглээ, түүнтэй холбоотой эрүүл мэндийн эрсдэл өсөж буй өнөө үед уг төсөл нь олон нийтийн анхаарлыг татаж буй бөгөөд хуулийн хэрэгжилт, хяналтын арга механизмыг сайжруулах шаардлагыг дэвшүүлж байна.

Эх сурвалж: УИХ