МАН-ын Их хурал энэ сарын 15-нд болно. Гол ажил нь намын даргаа сонгож, хямралд ороод байгаа төр засгийг эмхлэх юм. Уул нь бага хурлаараа намын даргаар Д.Амарбаясгаланг сонгогдсон гэж үзээд хуучин дарга Л.Оюун-Эрдэнэ тамга тэмдгээ хүлээлгэн өгсөн.

Гэвч дүүргийн шүүхэд энэ хурал луйвартай болсон гэж өргөдөл өгөөд тэр сонголтыг нь хүчингүй болгосон. Одоо намын дарга Л.Оюун-Эрдэнэ хэвээрээ байгаа юм байна. Үүрүүд төлөөлөгчөө сонгон Их хуралдаа илгээх ажил ид өрнөөд одоо дууссан. Төлөөлөгчид очиж байгаад алаад өгнө өө гэсэн хүмүүс л байна.

Үүрийн хурал төлөөлөгчиддөө “Хурлыг нээлттэй явуул” гэсэн үүрэг өгсөн бөгөөд тэд нь ч очоод чухам сүйдлэх юм ярьцгааж байгаа. Харин энэ намын толгойд байгаа хүмүүс хурлыг яаж явуулах вэ гэсэн уулзалт ид болж байна. Г.Занданшатар, Ерөнхийлөгч У.Хүрэлсүх, бас Д.Амарбаясгалангийн талынхан уулзалт хийцгээж байгаа гэж улс төр ажиглагчид хэлж байна. Үнэн эсэхийг бүү мэд.

Тэд юу ярьж байгаа вэ гэвэл намын даргыг сонгоход гурван хувилбараар Их хуралд оруулах гэнэ. Нэгдүгээрт, хоёр нэр дэвшигчийг хоёуланг нь өрсөлдүүлээд гуравдагч хүн гаргах, Мөн хоёр нэр дэвшигчийг хооронд нь тохироо хийлгээд ялж байгаагаар нь Г.Занданшатарыг намын дарга болгох. Бүр болохгүй бол шууд шинэ хүн нэр дэвшүүлэх. Энэ гурвын алийг явуулах вэ гэдэг дээр тохироо яриа хэлэлцээ ид явагдаж байна.

Намын даргад шинээр сонгогдох хамгийн магадтай хүнээр Н.Учрал, Ж.Энхбаяр нар яригдсан гэнэ. Намын Их хурлын төлөөлөгчид бол ямар ч хамаа байхгүй. Тэд мэдээж нам ингэж шийдсэн гэхэд л тэрүүгээр явж таараа гэж үзэж байгаа юм шиг байна. Олон жилийн туршлага ч үүнийг нотолж байгаа. Тэд ярсхийтэл гар өргөхөд л хэрэг болох төдий зүйл гэсэн шиг байна. Ер нь бол Н.Учрал нэр дэвшвэл хоёр бүлэг аль нь ч гэсэн дэмжих магадлал өндөр гэж үзэцгээж байгаа бололтой. Ж.Энхбаярыг бол туршлагатай намын хурлын төлөөлөгчид бүгд мэднэ гэдгийг ч тооцжээ.

Өдрийн сонин