x

М.Энхболд: Хэлэх үг байвал суудалдаа суугаад хэл

Улсын таван гишүүн Их хурлын дарга М.Энхболдыг огцрохыг шаардан чуулганы танхимын үүдэнд суулт зарласан. УИХ-ын гишүүн Л.Оюун-Эрдэнэ, Т.Аюурсайхан, Ж.Батзандан, Л.Болд, Б.Энх-Амгалан нар УИХ-ын дарга М.Энхболдыг огцорсны дараа чуулганы хуралдаанд оролцоно гэж мэдэгдсэн юм. УИХ-ын гишүүд бойкотоо чуулганы танхимд үргэлжлүүлж байна.

УИХ-ын гишүүн Л.Болд “УИХ-ын дарга өөрийн хүсэлтээр огцрох боломж хуулийн хүрээнд бий. Суудалдаа шигдээд байж болох ч Монголын ард түмэн хүлээж авч байна уу үгүй юу гэдгийг өөрөө судалж үзэх хэрэгтэй. М.Энхболдод Их хурлыг удирдах ёс зүй байхгүй” гэсэн юм. 

УИХ-ын гишүүн Л.Оюун-Эрдэнэ “Гишүүд бидний тэмцэлд нэгдвэл “М.Энхболд УИХ-ыг даргалах ёс зүйн эрхгүй” гэсэн бичгийг  чуулганы танхимын ширээн дээрээ тавьж болно. Таван гишүүн нэгдэж энэ уриалгыг эхлүүлж байна. Бид УИХ-ын даргыг Үндсэн хууль зөрчсөн гэж үзэж байгаа. Үндсэн хууль зөрчсөн тохиолдолд УИХ-ын гишүүн бойкот хийх эрхтэй” гэв. 

Ийнхүү гишүүд чуулганы танхимын үүдэнд бичиг барьж суулт хийж байгаад удалгүй чуулганы танхим руу орж индэрийн ард зогсоцгоов. 

УИХ-ын дарга М.Энхболд “Та нар ард түмнээс сонгогдсон ард түмний төлөөлөл. УИХ-ын үйл ажилалааг хэвийн явуулах шаардлагатай. Та нар хэлэх юм байвал суудалдаа суугаад хэл” гэсэн шаардлага тавив. 

УИХ-ын гишүүн Ц.Нямдорж: М.Энхболд даргаа та наад гишүүдтэйгээ уулзаж ярилц л даа. Энэ хооронд Л.Энх-Амгалан гишүүн чуулганы үйл ажиллагааг үргэлжлүүлж байя. Та нар уулзаад ярилц. Аль аль талаасаа уян хатан хандацгаа л даа. Нэг талын 100 хувь буруу гэж байхгүй. Асуудлыг ойлголцож шийдэх сурах хэрэгтэй. Хоёр талаасаа чангаагаад байвал юу ч явахгүй.

ХХААХҮ-ийн сайдын томилгооны асуудлыг түр хойшлуулж Ашигт малтмалын тухай хуульд нэмэлт, өөрчлөлт оруулах тухай хуулийн төслийг хэлэлцэж эхэллээ. 

Мөн УИХ-ын дарга М.Энхболд суулт зарласан гишүүдтэй яг одоо өрөөндөө уулзаж байгаа бөгөөд чуулганы хуралдаан үргэлжилж байна.

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

Top