Аймаг, нийслэл, сум, дүүргийн Иргэдийн Төлөөлөгчдийн Хурлын 2025 оны нөхөн сонгуульд Монгол Ардын нам, Ардчилсан нам, Хүний Төлөө Нам (ХҮН), Иргэний зориг ногоон нам оролцохоо албан ёсоор илэрхийллээ. Нам, эвслүүд оролцох хүсэлтээ тухайн шатны сонгуулийн хороонд энэ сарын 23-наас өмнө хүргүүлэх бөгөөд сонгуулийн хороо тав хоногийн дотор бүртгэх эсэхийг шийдвэрлэнэ.
Хоёр аймгийн ИТХ-д тус бүр нэг мандатын төлөөх нөхөн сонгуульд дээрх дөрвөн нам оролцохоор болсныг холбогдох аймгийн сонгуулийн хороо бүртгэжээ. Мөн сумын ИТХ-ын 61 мандатад нөхөн сонгууль явуулах бөгөөд:
-
Монгол Ардын нам – 50 мандат
-
Ардчилсан нам – 43 мандат
-
ХҮН нам – 6 мандат
-
Иргэний зориг ногоон нам – 1 мандатад тус тус бүртгүүлсэн байна.
Нөхөн сонгуульд оролцохоор бүртгүүлсэн намуудын бие даан нэр дэвшүүлэх ажиллагаа тавдугаар сарын 8-14-нийг дуустал үргэлжилнэ. Нэр дэвшигчийн баримт бичгийг тавдугаар сарын 17-ныг дуустал сонгуулийн хороонд хүргүүлэх бөгөөд хороод долоо хоногийн дотор баримтыг хянаж, бүртгэх эсэхээ тогтоолын хэлбэрээр шийдвэрлэнэ.
Нэр дэвшигчийн үнэмлэхийг зургаадугаар сарын 7-нд олгож, нийтэд мэдээлсний дараа албан ёсны сурталчилгаа эхэлнэ. Харин нөхөн сонгуулийн санал хураалтыг зургаадугаар сарын 22-ны өдөр, Улаанбаатарын цагаар 07:00-20:00 цагийн хооронд зохион байгуулах юм.
Эх сурвалж: СЕХ, аймаг нийслэлийн сонгуулийн хороод
