Ватикан хотын Гэгээн Петрийн талбайд Гэгээн Ширээт Улсын төрийн тэргүүн агсан Пап Францистай салах ёс гүйцэтгэх ёслол болж өндөрлөлөө. Энэхүү ёслолд Монгол Улсын төр засгийг төлөөлөн Гадаад харилцааны сайд Б.Батцэцэг оролцож, хүндэтгэл илэрхийллээ. Пап Францис буюу Буэнор-Айресийн хамба Хосе Марио Берголио 2013 онд Папаар өргөмжлөгдсөнөөсөө хойш дэлхий даяар энх тайван, ард түмэн хоорондын харилцан хүндэтгэлийг бэхжүүлэх, энэрэл нигүүлслийг түгээх үйлсэд үнэтэй хувь нэмэр оруулсан хүн юм.
Монгол Улс, Гэгээн Ширээт Улсын харилцааны түүхэнд анх удаа төрийн тэргүүний түвшинд айлчлал хийгдсэн бөгөөд 2023 онд Пап Францис Монголд айлчилж, хоёр орны харилцаанд шинэ хуудас нээсэн түүхэн үйл явдал болж байлаа. Айлчлалын үеэр тэрбээр Монголын ард түмнийг сүсэг бишрэл, оюун санааны эрх чөлөөний бэлгэ тэмдэг хэмээн онцолж, дэлхий нийтийн энх тайван, амар амгалангийн төлөөх Монголчуудын хувь нэмрийг өндрөөр үнэлсэн байна.
Сүүлчийн замд нь үдэх ёслолд дэлхийн 150 гаруй орны төр, засгийн тэргүүн нар хүрэлцэн ирж оролцсон талаар Гадаад харилцааны яам мэдээлэв.
Эх сурвалж: Гадаад харилцааны яам
