Эрүүл ирээдүйг бий болгох зорилтын хүрээнд хэрэгжиж буй чухал ажлуудын нэг нь ерөнхий боловсролын сургуулиудад эрүүл мэндийн боловсрол олгох мэргэжлийн багш бэлтгэх хамтарсан хөтөлбөр юм. Одоогоор уг хөтөлбөрийн дагуу 27 оюутан шинээр суралцаж байна.
Боловсролын үнэлгээний төв (БҮТ) болон Боловсролын ерөнхий газрын (БЕГ) 2023 онд хийсэн судалгаагаар, улсын хэмжээнд эрүүл мэндийн хичээл заах 2500 гаруй багш шаардлагатай байгаа ч тэдгээрээс зөвхөн 379 нь мэргэжлийн багш бөгөөд үлдсэн нь мэргэжлийн бус багш нар байгааг тогтоожээ.
Энэхүү нөхцөл байдлыг сайжруулахын тулд эрүүл мэндийн багш бэлтгэх ажлын хэсгийн гишүүд энэ сарын 15-нд Монгол Улсын Ерөнхийлөгчийн эрүүл мэнд, нийгмийн бодлогын зөвлөх Б.Бадамцэцэгтэй уулзаж, хөтөлбөрийн хэрэгжилтийг эрчимжүүлэх, шаардлагатай зохицуулалт хийх талаар санал солилцсон байна.
“Эрүүл монгол хүн” үндэсний хөдөлгөөний хүрээнд хэрэгжиж буй энэхүү санаачилга нь МУБИС болон АШУҮИС хамтран эрүүл мэндийн хичээл заах мэргэжлийн багш бэлтгэх байдлаар хэрэгжиж эхэлсэн. Уг хөтөлбөрийг бүрэн хэрэгжүүлснээр хүүхэд, өсвөр үеийнхэнд суурь мэдлэг, зөв хандлага төлөвшүүлэх, улмаар эрүүл амьдралын хэв маягийг төлөвшүүлэх урт хугацааны суурь нөхцөл бүрдэхээр байна.
Эх сурвалж: Монгол Улсын Ерөнхийлөгчийн Тамгын газар
