НҮБ-ын Хувийн мэдээлэл хамгаалах эрхийн асуудал хариуцсан Тусгай илтгэгч Др. Ана Брайан Нугререс энэ сарын 8-14-нд манай улсад албан ёсоор айлчилж байна.

Айлчлалын хүрээнд ЦХИХХЯ-ны Төрийн нарийн бичгийн даргын албан үүргийг түр орлон гүйцэтгэгч П.Алтан-Одтой уулзаж, хамтын ажиллагааны талаар хэлэлцэв.

Уулзалтын үеэр П.Алтан-Од “Монгол Улс НҮБ-ын ‘Цахим Засаглалын индекс’-т 2024 онд 46 дугаар байрт жагсаж, 28 байраар урагшилсан бол Дэлхийн оюуны өмчийн байгууллагын ‘Дэлхийн инновацын индекс’-т 67 дугаар байранд эрэмбэлэгдсэн”-ийг онцлоод, 2021 онд баталсан цахим хөгжлийн багц хуулиудыг танилцууллаа.

Эдгээрт Нийтийн мэдээллийн ил тод байдлын тухай, Кибер аюулгүй байдлын тухай, Хувийн мэдээлэл хамгаалах тухай, Цахим гарын үсгийн тухай хуулиуд багтдаг бөгөөд хуулиудыг боловсруулахдаа Германы хууль тогтоомжийг чиглэл болгожээ. 

Мөн түүнчлэн 2024 оны эцсийн байдлаар Монгол Улсад 1,384,523 тоон гарын үсэг олгосон ч цахим үйлчилгээнд ашиглах, хэрэглээг нэмэхийн тулд үндэсний хэмжээний нэгдсэн программ хангамж хөгжүүлэх шаардлагатайг дурдав. 

Др.Ана Брайан Нугререс айлчлалынхаа хүрээнд дижитал эринд хувийн мэдээллээ хамгаалах, хил дамнасан мэдээллийн урсгал, кибер аюулгүй байдал, олон нийтийн сүлжээнд тавих хяналт, цензур, эмзэг бүлгийн нууцлал, биометр болон хиймэл оюунд суурилсан мэдээллийн аюулгүй байдлыг хөндөж, дүгнэлт, зөвлөмж боловсруулахаар төлөвлөж байгааг ЦХИХХЯ мэдээлжээ.