Хөдөлмөрийн аюулгүй байдал, эрүүл ахуйн тухай хууль, дүрэм, журмыг хэрэгжүүлэх, ажлын байрны аюулгүй, эрүүл орчныг бүрдүүлэх зорилготой Хөдөлмөрийн аюулгүй байдал, эрүүл ахуйн аяны нээлт өнөөдөр боллоо. Аяныг Олон улсын хөдөлмөрийн байгууллагын “Хөдөлмөрийн аюулгүй байдал, эрүүл мэндийн хөгжил: Хиймэл оюун ухааны хэрэглээ ба цахимжилт” уриан дор зохион байгуулж байгаа бөгөөд орон даяар хэрэгжүүлэхээр төлөвлөжээ.

2024 онд үйлдвэрлэлийн осол, хурц хордлогод өртсөн хүний тоо 809 болж, өмнөх оноос хоёр дахин өссөн нь анхаарал татаж байна. Үйлдвэрлэлийн осол, мэргэжлээс шалтгаалсан өвчлөл хамгийн их бүртгэгдэж буй салбаруудад уул уурхай, барилга, зам, тээвэр багтаж байна. Иймд хөдөлмөрийн аюулгүй байдал, эрүүл мэндийн салбарт хууль эрх зүйн орчныг сайжруулах, цахим шилжилт хийх, дэд бүтцийг хөгжүүлэх, тусламж үйлчилгээг хүртээмжтэй болгох, мэргэжлийн хүний нөөцийг чадавхжуулах зэрэг ажлыг шат дараатай хэрэгжүүлэхээр болжээ.

Энэ оны аяны хүрээнд:

• Нэгдүгээр улиралд эрчим хүчний салбарт,

• Үлдсэн улиралд уул уурхай, барилга, зам тээврийн салбарт хөдөлмөрийн аюулгүй байдал, эрүүл мэндийн стандартын хэрэгжилтийг сайжруулах, эрсдэлийг бууруулах чиглэлээр төлөвлөгөөт ажлуудыг зохион байгуулах юм байна.

Эх сурвалж: ХНХЯ