Монгол Улсын Их Хурлын дарга Д.Амарбаясгалангийн Их Британи, Умард Ирландын Нэгдсэн Хаант Улсад хийж буй албан ёсны айлчлал албан ёсоор эхэллээ.

Тэрбээр энэ сарын 19-нд Уэстминстерийн ордонд Их Британийн Парламентын Нийтийн танхимын дарга Л.Хойлтой уулзалт хийж, хоёр улсын харилцаа, хамтын ажиллагааны талаар санал солилцов. Уулзалтын үеэр талууд сүүлийн жилүүдэд бүх салбарт харилцаа идэвхтэй хөгжиж байгааг онцлон тэмдэглэж, хууль тогтоох байгууллагуудын хамтын ажиллагааг өргөжүүлэх асуудлыг хэлэлцсэн байна.

УИХ-ын дарга Д.Амарбаясгалан уулзалтын үеэр дараах асуудлуудыг танилцуулав:

• Монгол Улсын парламентын засаглалыг бэхжүүлэх “Гурван төгөлдөршил” бодлого
• Эдийн засгийн хөгжил, худалдаа, хөрөнгө оруулалтыг нэмэгдүүлэх чиглэлээр хэрэгжүүлж буй үйл ажиллагаа
• Эрх зүйн орчны шинэчлэл

Британийн Парламентын Нийтийн танхимын дарга Л.Хойл Монгол Улсын парламентын тэргүүний албан ёсны айлчлалын ач холбогдлыг онцолж, энэ нь хоёр улсын хууль тогтоох байгууллагуудын хамтын ажиллагааг бэхжүүлэхэд чухал үүрэг гүйцэтгэнэ гэдэгт итгэлтэй байгаагаа илэрхийллээ.

Уулзалтын дараа УИХ-ын дарга Д.Амарбаясгалан Парламентын Нийтийн танхимын Хүндэт зочны дэвтэрт гарын үсэг зурлаа.