Батлан хамгаалахын сайд С.Бямбацогт, УИХ-ын гишүүн Н.Наранбаатар, ЗХЖШ-ын дарга хошууч генерал С.Ганбямба, Монгол Улсын Ерөнхийлөгчийн Аюулгүй байдал, Батлан хамгаалах бодлогын зөвлөх бригадын генерал Д.Баасандамба тэргүүтэй ажлын хэсэг 2025 оны 3 дугаар сарын 7-10-ны өдрүүдэд Бүгд Найрамдах Өмнөд Судан Улсад (БНӨСУ) явагдаж буй НҮБ-ын "UNMISS" энхийг дэмжих ажиллагаанд оролцож, Монгол Улсын XIV ээлжийн мотобуудлагын батальоны үйл ажиллагаа, үүрэг гүйцэтгэлтэй биечлэн танилцав.

Монголын мотобуудлагын батальоны үүрэг, техникийн шинэчлэл

Монгол Улсын Зэвсэгт хүчний 850 хүнтэй мотобуудлагын батальон энэхүү ажиллагаанд 14 дэх жилдээ амжилттай оролцож байна. Ажлын хэсэг цэргийн багийн үүрэг гүйцэтгэл, тэдний нөхцөл байдалтай газар дээр нь танилцаж, цаашид бэлэн байдлыг дээшлүүлэх зорилгоор техникийн шинэчлэлийн ажлын эхлэлийг тавьжээ. Энэ хүрээнд XIV ээлжийн мотобуудлагын батальонд 14 нэгж шинэ техник хүлээлгэн өгсөн байна.

Мотобуудлагын батальон хамгийн сүүлд 2022 онд 34 нэгж техникээр парк шинэчлэлт хийж байсан бол энэ удаа нийт 73 нэгж техникийг шинэчлэн, сэргээн сайжруулах ажил хэрэгжих юм.

Энэхүү шинэчлэл нь Монгол Улсын энхийг сахиулах ажиллагаанд оролцож буй цэргийн хүчний бэлэн байдлыг хангаж, үүргээ амжилттай биелүүлэхэд чухал ач холбогдолтой гэж үзэж байна.

Эх сурвалж: Батлан хамгаалах яам