УИХ-ын Инновац, цахим бодлогын байнгын хороо 2025 оны нэгдүгээр сарын 30-нд 2024 оны намрын ээлжит чуулганы хугацаанд хийсэн ажлынхаа талаар хэвлэлийн бага хурал зохион байгуулав. Тус байнгын хорооны дарга Ж.Золжаргал мэдээлэл өгч, сэтгүүлчдийн асуултад хариуллаа.
Тэрбээр, өнгөрсөн хугацаанд инновац, цахим бодлогын салбарын хууль эрх зүйн орчин харьцангуй сайжирч, төрийн үйлчилгээний цахимжилт тодорхой түвшинд хүрсэн ч хуулийн хэрэгжилтийг хангах, төрийн өмчийн хөрөнгөөр ажил, үйлчилгээ худалдан авах үйл ажиллагааны үр ашгийг сайжруулах шаардлагатай хэмээн дүгнэсэн байна.
Хууль, тогтоомжийн хэлэлцүүлэг
Байнгын хороо намрын чуулганы хугацаанд долоон удаа хуралдаж, нийт 14 асуудлыг хэлэлцжээ. Үүнд:
- Гурван хуулийн төсөл
- Байнгын хорооны гурван тогтоолын төсөл
- Хууль хэрэгжилтийн талаарх найман мэдээлэл багтаж байна.
Мөн нэг ажлын хэсэг байгуулж, нэг удаа хэлэлцүүлэг зохион байгуулсан байна.
Онцлох хэлэлцүүлгүүд
- Хиймэл дагуулын төслийн талаар Монгол Улсын сайд, Засгийн газрын хэрэг эрхлэх газрын даргын мэдээлэл
- Нийтийн мэдээллийн ил тод байдлын тухай хуулийн хэрэгжилтийн талаар Цахим хөгжил, инновац, харилцаа холбооны сайдын мэдээлэл
- Шилэн дансны тухай хуулийн хэрэгжилтийн талаар Сангийн сайдын мэдээлэл
- Виртуал хөрөнгийн үйлчилгээ үзүүлэгчийн тухай хуулийн хэрэгжилтийн талаар Санхүүгийн зохицуулах хорооны даргын мэдээлэл
- Шинжлэх ухаан, технологи, инновацыг хөгжүүлэх талаар Тэргүүн Шадар сайд бөгөөд Эдийн засаг, хөгжлийн сайдын мэдээлэл
- Хилийн чанад дахь монгол иргэдийн төрийн цахим үйлчилгээ, цахимаар сонгууль өгөх эрхийг хангах талаар Сонгуулийн Ерөнхий хорооны дарга, Үндэсний дата төв, И-Монгол академийн захирлын мэдээлэл
Хууль хэрэгжилтийн асуудлууд
Нийтийн мэдээллийн ил тод байдлын тухай хуулийн 29 дүгээр заалтын хэрэгжилт хангалтгүй байгаа нь тогтоогдсон байна. Төрийн үйлчилгээнд зориулан худалдан авсан цахим системүүд давхардаагүй байх, үр ашигтай байх тухай заалт хэрэгжээгүй бөгөөд өнгөрсөн 10 жилийн хугацаанд хоёр их наяд төгрөгийн цахим системийн худалдан авалт хийгдсэн талаар урьдчилсан мэдээлэл байна. Үүнтэй холбоотойгоор холбогдох яаманд хуулийн хэрэгжилтийг хангуулах чиглэл өгсөн бөгөөд энэ оны нэгдүгээр улиралд хийсэн ажлын тайлангаа байнгын хороонд танилцуулах үүрэг өгчээ.
Мөн Монгол Улсын төсвийн гүйцэтгэлийг сараар, улирлаар ойлгомжтой, хүртээмжтэй байдлаар олон нийтэд мэдээлэх хуулийн заалт хэрэгжихгүй байгааг тогтоож, холбогдох байгууллагад чиглэл өгсөн байна.
Ирээдүйн бодлого, зохицуулалт
Байнгын хорооноос дараах чиглэлээр ажлын хэсэг байгуулан ажиллаж байна:
- Гадаад улсад ажиллаж, амьдарч буй иргэдийн цахим болон бусад хэлбэрээр сонгуульд оролцох боломжийг хангах бодлого боловсруулах
- Мэдээллийн технологийн үйлдвэрлэлийг дэмжих тухай хуулийг бүрэн хэрэгжүүлэхийн тулд холбогдох журмуудыг боловсруулах
- Криптовалютын эрх зүйн зохицуулалтыг тодорхой болгох (Ажлын хэсгийг УИХ-ын гишүүн Л.Соронзонболд ахалж байна)
- Төрийн үйлчилгээний процессын дахин инженерчлэлийн үйл ажиллагааг эрчимжүүлэх (Ажлын хэсгийг УИХ-ын гишүүн Ч.Анар ахалж байна)
- Хиймэл оюун ухааныг ашиглан хуулийн давхардлыг арилгах шийдэл боловсруулж, нэвтрүүлэх
Мөн Инновацийн тухай хуульд нэмэлт, өөрчлөлт оруулах хуулийн төслийг боловсруулж байгааг мэдээлэв.
Эх сурвалж: УИХ-ын Хэвлэл мэдээллийн газар
