Цагдаагийн байгууллагаас цаг үеийн нөхцөл байдлын талаар мэдээлэл хийлээ. Энэ үеэр сонгуулийн тухай хуулийг зөрчсөн зөрчлийн талаар танилцуулав.

ЦЕГ-ын Урьдчилан сэргийлэх газрын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Г.Пүрэвдэлгэр: 

-Он гарснаас хойш сонгуулийн хуулийг зөрчих зөрчилтэй холбогдуулан тавдугаар сарын 29 буюу өнөөдрийн байдлаар нийт 56 гомдол мэдээлэл цагдаагийн байгууллагад бүртгэгдсэн.

Үүнээс зөрчлийн шинжтэй 35, гэмт хэргийн шинжтэй 21 гомдол мэдээлэлд эрүүгийн хэрэг хянан шийдвэрлэх болон зөрчил шалган шийдвэрлэх үйл ажиллагааг цагдаагийн байгууллагаас явуулж байна.

Соёлын сайд Ч.Номин, Эдийн засгийн хөгжлийн сайд Ч.Хүрэлбаатар нартай холбоотой гомдол мэдээлэл цагдаагийн байгууллагад бүртгэгдсэн, шалгагдаж байгаа. Тогтоогдсон нөхцөл байдлыг эрх бүхий байгууллагад албан бичгээр хүргүүлнэ. Зөрчилтэй нэр дэвшигчийг бүртгэх эсэх нь Сонгуулийн Ерөнхий Хорооны шийдэх асуудал гэв.