Ерөнхийлөгч У.Хүрэлсүхийн санаачилж өргөн барьсан Улс төрийн намын тухай болон Улс төрийн намын санхүүжилтийн тухай хуулийн төслийг УИХ улсын баяр наадмын өмнө хэлэлцэн батлахаар ажиллаж байна.

Уг хуулиуд нь улс төрийн намуудын үйл ажиллагааг нээлттэй, ил тод болгох, санхүүжилтээ ил тод тайлагнах болон улс төрийн намуудыг төсвөөс санхүүжүүлэхээр зохицуулсан. Ялангуяа намуудыг төсвөөс санхүүжүүлэх асуудал иргэдийн дунд нэлээд шүүмжлэл дагуулж байгаа бөгөөд УИХ дахь МАН-ын бүлэг өчигдөр энэ асуудлыг хэлэлцэн шийдвэрээ гаргажээ. Тодруулбал, УИХ-д авсан суудлын тоогоор санхүүжилт олгоно. Ингэхдээ нийт сонгогчдын нэгээс илүү хувийн санал авсан намыг төсвөөс санхүүжүүлэхээр болсон байна.

Өнөөдрийн байдлаар манайд УДШ-эд бүртгэлтэй 35 улс төрийн нам байна. Гэвч парламентад суудалтай нам нь гуравхан. Өнгөрөгч 2020 оны сонгуулиар АН, МАН, МАХН болон ХҮН УИХ-д суудал авсан боловч МАХН нь 2021 оны дөрөвдүгээр сард албан ёсоор МАН-д нэгдсэн. Тэгэхээр хэрвээ Улс төрийн намын санхүүжилтын тухай хууль батлагдвал ирэх 2024 оны сонгууль намуудын хувьд санхүүжилтын төлөөх ширүүхэн өрсөлдөөн болох нь.