Сөрөг хүчний үүргийг гүйцэтгэж байгаа УИХ дахь АН-ын бүлэг 13 гишүүнтэй байсан ч тав нь бүлгээсээ хөөгдөж, найман гишүүнтэй үйл ажиллагаа явуулж байна.

Хамгийн сонирхолтой нь, бүлгээсээ хөөгдсөн гишүүд нь УИХ дахь АН-ын бүлгийн даргаар ажиллаж байгаа УИХ-ын гишүүн Д.Ганбатыгаа огцруулсан гэх мэдээллийг өгсөн. Гэвч өнөөдөр АН-ын бүлгийн дарга Д.Ганбат нь дээрх мэдээллийг үгүйсгэж, намын бүлэг нь хэвийн ажиллаж байгаа гэдгийг мэдэгдсэн юм.

Өнөөдөр тус намын Үндэсний бодлогын хорооны гишүүн Д.Мөнх-Эрдэнэ УИХ дахь АН-ын бүлгийн зөвлөхөөр томилогдлоо.

Тэрээр зөвлөхөөр томилогдсон үнэмлэхээ Д.Ганбатаас гардан авсан бөгөөд энэ талаараа өөрийн цахим хуудаснаа "УИХ дахь АРДЧИЛСАН НАМЫН бүлгийн зөвлөхөөр томилогдлоо. УИХ-ын гишүүн, АН-ын бүлгийн дарга Д.Ганбатаас үнэмлэхээ гардаж авлаа. Төрийн ордны дотоод журам болон холбогдох хууль тогтоомжийг хүндэтгэж ажиллах болно. Монгол Төрийн минь сүлд ивээг" гэжээ.