УИХ-ын гишүүн, УИХ дахь Ардчилсан намын бүлгийн дарга Д.Ганбат ХЗДХЯ-ны гадна суулт хийж буй иргэдтэй очиж уулзав.
Иргэд “Одоо боллоо” цуглааныг зохион байгуулагч иргэн Д.Монголхүү болон бусад найман залууг цагдаагийн байгууллагаас саатуулсныг эсэргүүцэж байна.
УИХ-гишүүн Д.Ганбат “Х.Нямбаатар сайд иргэдийг хүлээн авч уулз. Тэднийг жагсаал цуглаан хийлгэхгүй байх шалтгаанаа маш тодорхой тайлбарлах ёстой. Иргэдийн бухимдал дээд цэгтээ туллаа. Үндсэн хуульд хүмүүнлэг ардчилсан нийгмийг бүтээнэ гэж тунхагласан. Иргэд цагдаа нарын дунд зөрчил үүсгэснээс үүдэн гарсан гашуун түүхийг давтаж болохгүй” гэдгийг онцоллоо.
Мөн ардчилсан улс иргэдээ хамгаалах тогтолцоотой байх ёстой болохоос, авлигачдыг хамгаалдаг байж болохгүй. Татвар төлөгчдийн мөнгөөр санхүүждэг МҮОНТ эдгээр иргэдийн эрх ашгийг хамгаалж, тэдний дуу хоолойг хүргэхгүй байгаад харамсч буйгаа илэрхийлэв.
