Энэ сонгуулийн хамгийн хөөрхөн дуулиан нь Малина ба Алина гэсэн нэр авсан энэхүү зураг болов.
Зураг сошиал ертөнцөд тархангуут үмх талхны төлөө биеэ худалдсан Малина хэмээх киноны дүр сайхан бүсгүйг “монголшуулж” ирээд л баахан муулав. Араас нь нэр дэвшигчээ хутгалсан тэнэг PR, хөөрхөн, сайхан хүүхэн шалгаруулах тэмцээн болж байгаа биш гэх мэтчилэн олон яриа маргаан дэгдсэн. Зам зуурт нэр дэвшигч А.Адъяасүрэн АН-ын Алина, цэнхэр дээлтэй Адина гэсэн нэр хүртэж, Монголд бараг танихгүй хүнгүй шахам болов.
Уг нь энэ зургийн А.Адъяасүрэнд нутгийнх нь Болдбаатарын Алтансүх гэдэг залуу “Таалагдвал шэйрлээрэй” гэсэн захиастайгаар ирүүлсэн. Нэр дэвшигч шэйрлэж орхилгүйг л яах вэ, сэтгэлийн үгтэй зураг ирж байхад. Ингээд бөөн шуугиан. Харин өчигдөр шуугианы эзэн Б.Алтансүх нэр дэвшигчийг аймгийнхаа төвд ирэхэд нь биечлэн уулзаж, зурагныхаа талаар тайлбарлаж өгчээ.
Рут Оркин хэмээх бүсгүй “Америк бүсгүй Италид” нэртэй, алдартай зураг.
Рут энэхүү зургийг 1951 оны 8-р сард авч, дараа жил нь 1952 онд Cosmopolitian сэтгүүлд “Эмэгтэйчүүдээ ганцаараа айдасгүй аял” гэсэн тайлбартайгаар нийтлэгджээ. Зургийн эзэн урлаг судлалын оюутан 23 настай Нинали Эллэн.
Басаж гутаасан, шоолж дооглосон, сонжсон сонирхсон олон эрчүүдийн харцыг зүсэж, зорьсон чигтээ алхаж яваа бүсгүйн энэхүү өвөрмөц зураг үүнээс хойш эмэгтэйчүүдийн тэгш эрх, үзэл санааны эрх чөлөөний билэг тэмдэг болон алдаршсан.
Зургийн эзэн болон зурагчин бүсгүй хоёр насан туршдаа нөхөрлөж, Рут Оркин 1985 онд 63 настайдаа, Нинали Эллэн 2018 онд 90 настай тэнгэртээ буцаж, гэрэл зураг л үлджээ. Гэхдээ энэхүү зураг 60 гаруй жилийн турш эмэгтэйчүүдийн эрхийг тунхаглаж, зоригтой хүчтэй, өөрийнхөөрөө байх уриалгад дуудсаар байгаа.
Харин монголчуудын хувьд “Малина” гэдэг дүр илүү тод буусан бололтой. Гэхдээ магадгүй 68 жилийн өмнө Рутын энэ зураг ч маш их шүүмжлэл, гадуурхалтыг даван туулсан байж таараа.
Үүнийг дууриалгасан зураг ч Монголын сонгуулийн хэрүүл тэмцэлтэй, халуун өдрүүдэд хөнгөхөн наргиа, гэгээ нэмсэн гэж А.Адъяасүрэнгийн багийнхан. Нээрээ ч өрсөлдөгчдийнх нь хийж байгаа янз бүрийн болхи эвлүүлэг гүтгэлгүүдийн дэргэд энэ бол үнэхээр гэгээн, сайхан хөөрхөн зураг.
Тийм болохоор А.Адъяасүрэнгийн энэхүү зургийн түүхийг үргэлжлүүлэх гэж байгаа гэсэн. Тэр нь юу байх бол? Алина-парт-2 хэрхэн үргэлжлэх бол?
