Баянгол дүүргийн эрүүгийн хэргийн анхан шатны шүүхээс өнөөдөр "60 тэрбумын" гэх хэрэгт гэрчээр мэдүүлэг өгсөн Г.Доржзодовт Улаанбаатар хотын нутаг дэвсгэрээс гарах, уг хэрэгтыг яллагдагчаар татагдан шалгагдаж байгаа Ц.Сундуй, А.Ганбаатар нартай уулзахыг хориглох таслан сэргийлэх арга хэмжээ авчээ.
Түүнийг хэрэг хянан шийдвэрлэх ажиллагаанд саад учруулахгүй байх, дахин гэмт хэрэг үйлдэхээс урьдчилан сэргийлэх зорилгоор хязгаарлалт тогтоох таслан сэргийлэх арга хэмжээ авахуулахаар прокуророос ирүүлсэн саналыг шүүх хүлээн авсан байна.
Ц.Сандуй, А.Ганбаатар нарыг "Сонгууль, ард нийтийн санал асуулгад хууль бусаар нөлөөлөх, санал хураалтын дүнг буруу гаргах гэмт хэргийг үйлдэхээр бэлтгэсэн (хуулийн 14.9) хэрэгт буруутган өнгөрөгч оны есдүгээр сард анхан шатны шүүхээс дөрвөн жилийн хорих ял авсныг Нийслэлийн давж заалдах шатны шүүхээс хүчингүй болгож, хэргийг прокурорт буцаасан билээ. Давж заалдах шатны шүүх анхан шатны шүүх хуралдаанд гэрчээр оролцсон Г.Доржзодовыг уг хэрэгт хамтран оролцсон гэх үндэслэлтэй хэмээн үзэж, хэргийг шалгуулахаар прокурорт буцаасан байдаг.
Тэгвэл Нийслэлийн прокурорын газраас Г.Доржзодовыг сонгуулийг будлиантуулж төрийн эрх мэдлийг хууль бусаар авах хуйвалдаан зохион байгуулсан гэх хэрэгт яллагдагчаар татжээ. Түүнд 2002 оны Эрүүгийн хуулийн тусгай ангийн 82*1 дугаар зүйл "Сонгуулийг будлиантуулж төрийн эрх мэдлийг хууль бусаар авах хуйвалдаан зохион байгуулах" зүйл ангиар өнгөрөгч хоёрдугаар сарын 28-ны өдөр эрүүгийн хэрэг үүсгэсэн байна.
