Ардчилсан хувьсгалын 30 жилийн ойг тохиолдуулан өнөөдөр төр, нийгмийн нэрт зүтгэлтэн, БНМАУ-ын Сайд нарын зөвлөлийн дарга, эрдэмтэн, профессор Ж.Батмөнх агсны хөшөөнд цэцэг өргөж, хүндэтгэл үзүүллээ. Өдгөө 30 дахь жилтэйгээ золгож буй ардчиллыг бий болгох, тайван замаар шилжилтийг хийхэд түүний оруулсан хувь нэмэр багагүй билээ.
Жамбын Батмөнх агсан нь 1948 онд одоогийн МАН буюу тухайн үеийн МАХН-д гишүүнээр элсэж, 1973 онд МАХН-ын Төв Хорооны Шинжлэх ухаан, боловсролын хэлтсийн эрхлэгчээр, 1974 онд БНМАУ-ын Сайд нарын Зөвлөлийн орлогч дарга, мөн оны зургаадугаар сард БНМАУ-ын 13 дахь Ерөнхий сайдаар, 1984-1990 онд АИХ-ын Тэргүүлэгчдийн даргаар буюу Төрийн тэргүүнээр ажиллаж байжээ.
Мөн тэрээр, Монголд ардчиллыг хөгжүүлэх, улс орныг зах зээлийн харилцаа, олон намын тогтолцоонд шилжүүлэх явдалд эрх баригч намын болон төрийн тэргүүний хувиар ухаалаг бодлого явуулж, шийдвэр гаргасныг олон хүн дурсан ярьдаг. Цэцэг өргөх ёслолд түүний төрөл төрөгсөд, журмын нөхөд болон гэргий А.Даариймаа оролцжээ.
