БНСУ-ын Гадаад хэргийн сайд Кан Кюн Ва, Японы Гадаад хэргийн шинэ сайд Тошимицү Мотэги нар Нью-Йорк хотноо зохион байгуулж буй НҮБ-ын Ерөнхий Ассамблейн чуулганы хүрээнд уулзана гэж уг мэдээлэлд ойр эх сурвалжууд мягмар гарагт мэдээлжээ.
Гадаад хэргийн сайд нар орон нутгийн цагаар пүрэв гарагийн өглөө уулзах бөгөөд энэ сарын эхээр Японы Засгийн газарт халаа сэлгээ хийснээс хойш тэд анх удаагаа уулзах гэж буй нь энэ юм.
Талууд Японы экспортын хязгаарлалтаас үүдэлтэй хоёр талын харилцааны асуудлыг зохицуулах арга замын талаар хэлэлцэх төлөвтэй байна. Өнгөрсөн онд БНСУ-ын Дээд шүүх албадан хөдөлмөр эрхлүүлсний нөхөн төлбөрийг олгохыг Японы фирмүүдээс шаардсаны хариуд Токиогийн засаг захиргаа дээрх шийдвэрийг гаргасан хэмээн Сөүл үзэж байна.
Япон улсыг экспортын хяналтаа чангатгасантай холбогдуулан өнгөрсөн лхагва гарагт БНСУ тус улсыг худалдааны найдвартай түншүүдийн жагсаалтаасаа хасаж, есдүгээр сарын 11-нд Дэлхийн худалдааны байгууллагад гомдол мэдүүлсэн юм.
Сөүл болон Токиогийн засаг захиргаа хурцадмал байдлыг үл харгалзан яриа хэлэлцээгээ үргэлжлүүлэх хүсэлтэй байгаагаа илэрхийлсээр байгаа бөгөөд өнгөрсөн баасан гарагт хоёр талын дипломат түвшний төлөөлөгчид Токио хотод уулзсан байна.
МОНЦАМЭ
