Сүүлийн үед нийгмийн сүлжээ, мэдээллийн хэрэгслээр дуулиан болж, олон нийтийг талцуулж буй Тост, Тосонбумбын ордтой холбоотой асуудлаар Ерөнхий сайд У.Хүрэлсүх өнөөдөр харьяалах яам, агентлаг болон хууль, хяналтын байгууллагуудын удирдлагуудыг дуудаж уулзлаа.

Тэрээр Уул уурхайн сайд Д.Сумъяабазар, Байгаль орчин, аялал жуулчлалын сайд Н.Цэрэнбат, МХЕГ-ын дарга Н.Цагаанхүү, ЦЕГ-ын дарга С.Баатаржав, Тагнуулын ерөнхий газрын дарга Д.Гэрэл, Ашигт малтмал, газрын тосны газрын дарга Х.Хэрлэн болон бусад холбогдох албаны хүмүүстэй уулзалт хийж, үүрэг даалгавар өгсөн байна. Уулзалтын үеэр Ерөнхий сайд У.Хүрэлсүх:

-"Уул уурхайн салбарт ажиллаж байгаа зарим нэг олигархиуд уул ус хилэгнүүлж, ард түмнийг уйлуулж байна. Гурвантэс сумынхан уйлаад ярьж байна, та нар зурагтаар харсан байх. Тэд төрөөс юм гуйгаагүй, онгон дагшин байгаль, эко системээ аварч үлдэхийг хүсч байна. Үүнд буруу юм юу байна? Ард түмэн газар нутгаа ухуулахгүй гэж байхад яагаад ухаад байгаа юм бэ? Анхнаасаа хууль бусаар ологогдсон лиценз гэж би бодож байгаа. Сумын иргэдийн нийтийн хурлыг хуралдуулахгүйгээр шууд шийдвэр гаргаад Байгаль орчны яаманд ирүүлсэн гэсэн. Энэ талаар би та нарт 2-3 удаа үүрэг даалгавар өгсөн. Нэр холбогдоод байгаа УИХ-ын гишүүн Б.Чойжилсүрэн гэж нөхөрт хэд хэдэн удаа хэлж байсан. Яасан цадаж ханадаггүй шунал вэ?

Олигархиуд албан тушаалтнуудад авилгаддаг байсан бол одоо ард түмнийг авилгадах гэж оролдож байна. Гурван тэс сумын иргэн Нямдаваа гэдэг хүн уйлаад ярьж байна, сумынхаа удирдлагуудын тухай. Хэлэлцүүлэгт оролцох гэж ирсэн 40 гаруй хүнийг 3-5 сая төгрөгөөр амыг нь барих гэж оролдсон гэж байна. Яагаад үүнийг шалгахгүй байна, цагдаагийн дарга аа, тагнуулын арга аа? Хэрэг үүсгээд шалга, үүнийг. Тэр 370 мянган тонн нүүрсний хулгай яасан бэ? Ерөнхий сайд жилийн өмнө үүрэг өгсөн. Шалгаж байна л гээд байдаг, үр дүн нь хаана байна? Шударга ёсыг тогтоох ёстой, сайд нар аа. Ашигт малтмалын лицензийг нь цуцлах ёстой.

Тост, Тосон бумбын ордыг бүхэлд нь улсын тусгай хамгаалалтад авах ёстой, Байгаль орчны сайд аа. Ашигт малтмалын газрын дарга өнөөдөр шийдвэрээ гаргаад лицензийг нь цуцал. Аваачаад тавьчихсан машин, техник хэрэгслийг нь журамла, цагдаагийн дарга аа. Та өөрөө очоод ажил. Хууль бусаар олборлолт явуулсан тэр компаниар нөхөн сэргээлтийг нь хийлгэ. Хийлгэж чадахгүй бол та нар ажлаа өг. "Сауд Гоби"-гоос гадна дахиад 3-4 компани өнөө маргаашгүй ухах гээд хүлээж байгаа. Тэдний ч гэсэн тусгай зөвшөөрлийг цуцал. Одоо ашиглаж байгаа уул уурхайнуудаа л ашигла, Тавантолгойгоо, Оюутолгойгоо ашигла, одоо ашиглаж байгаа уурхайнуудаа л ашигла. Бусдыг нь цэгцэл, Д.Сумьяабазар сайд аа. Энэ газар нутгийн бүрэн бүтэн байдал, экосистемийн өмнө ямар ч хууль бөхийх ёстой.  Монголын хууль, шүүхийн байгууллага шударгаар ажиллана гэдэгт би итгэж байна" гэв.