“Олон улсын цэргийн тоглолт-2019”-ын хүрээнд болж байгаа морин цэргийн анхны “Аравт” марафон Таван толгой дахь зэвсэгт хүчний сургуулилтын полигонд эхэллээ. Орос, Монгол, Казахстан, Киргизийн цэргийн албан хаагчид оролцож байгаа энэ марафон тэмцээний нээлт дээр Монгол Улсын Зэвсэгт хүчний жанжин штабын даргын орлогч хошууч генерал Ж. Бадамбазар “Энэ бол спортын уралдаан тэмцээн биш. Харин цэргийн албан хаагчдын олон төрөлт мэргэжлийн тэмцээнд. Оролцогч улсуудын цэргийн албан хаагчдаас мэргэжлийн ур чадвар, оюун ухаанаа сохин уралдаж, хамтын ажиллагаагаа бэхжүүлэх, туршлага солилцох, улс орныхоо үндэсний уламжлалыг сурталчлах зорилготой цэргийн мэргэжлийн тэмцээн” гэлээ.
Морин цэргийн марафонд монголын 400 гаруй цэргийн албан хаагч оролцож байгаагаас гадна Онцгой байдлын албаны аврагч, эмч мэргэжилтнүүд дэмжлэг үзүүлэн оролцож байна.
Мөн эдгээр өдрүүдэд 10 улс оронд нэгэн зэрэг болж байгаа “Олон улсын цэргийн тоглолт-2019”-д дэлхийн 36 орны 6000 гаруй цэргийн албан хаагч оролцож байгаа юм.
