x

Венесуэлийн асуудлаарх бага хуралд Орос оролцохоос татгалзлаа

Венесуэлийн асуудлаар Перугийн нийслэл Лимад болох бага хуралд оролцохгүй гэж ОХУ-ын Гадаад хэргийн яам мэдэгдсэн байна. Перугийн Гадаад хэргийн яамнаас ирсэн урилгыг нарийвчилж үзсэн гэж Гадаад хэргийн яамны сайтад бичжээ. Тус бага хурлаар зохион байгуулагчид ямар зорилго зорилт тавьж байгааг Орос Латин Америкийн хөрштэйгөө ярилцсан юм байна.

“Юуны өмнө Венесуэлийн тухай, тэдний ардчиллын тухай асуудлыг венесуэльчүүдгүйгээр, Николас Мадурогийн Засгийн газаргүйгээр, улс төрийн бусад хүчний оролцоогүйгээр хэлэлцэхэд үнэн зөв шийдэл гаргана гэхэд итгэхгүй байна” гэж ОХУ-ын Гадаад хэргийн яам тэмдэглэсэн байна.

Үүнээс гадна өөр өөр байр суурьтай 100 гаруй төлөөлөгч оролцсон энэ бага хурал ганц өдрийн дотор Венесуэлийн төвөгтэй асуудлаар бодит шийдэл гаргаж туслах арга хэмжээ боловсруулна гэдэг юу л бол гэжээ. “Хамгийн гол нь Норвегийн зуучлалаар эхлүүлсэн венесуэлийн дотоод яриа хэлэлцээрийн үндсэн дээр энэ бага хурал юу шийдэх гэсэн зорилго нь тодорхойгүй байна. Зүгээр л гаднаас нь санал бодлоо солилцох нь харин ч талуудын харилцан итгэлцлийг улам төвөгтэй болгох юм биш биз” гэж тэд тайлбарлажээ.

Энэ оны нэгдүгээр сарын 23-нд Венесуэлийн Үндэсний ассамблейн спикер Хуан Гуайдо өөрийгөө тус улсын түр цагийн ерөнхийлөгч хэмээн зарласнаар Венесуэлийн улс төрийн нөхцөл байдал хурцадсан юм. АНУ, Европын холбоо, Өмнөд Америкийн улсуудын холбоо зэрэг Хуан Гуайдо тэргүүтэй сөрөг хүчнийг дэмжиж байгаа бол БНХАУ, ОХУ, Куба зэрэг улсууд ерөнхийлөгч Николас Мадурог дэмжиж байгаа юм.

ОХУ-ын Гадаад хэргийн сайд Сергей Лавров өнгөрсөн бямба гарагт Суринамын Гадаад хэргийн сайд Илдиз Поллак-Бейглетэй уулзах үеэрээ Венесуэлийн улс төрийн хямралыг зөвхөн Засгийн газар, сөрөг хүчин хоёрын шууд яриа хэлэлцээний замаар л шийдэж болно гэж мэдэгдсэн байна.

Х.Өлзийбаяр "Ардчилал таймс" сонин

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

Top