Энэ сарын 11-нд буюу Улсын баяр наадмын өдөр Тэрэлжийн Мойлтын тохойд 15 настай хүү өөрийн амь насыг үл хайрлан есөн настай хүүгийн алтан амийг уснаас аварсан зоригт үйл явдал болсон билээ.
Тэгвэл Ж.Тэмүүжин хүүг усанд живж байсан хүүхдийг аварсан зоригт үйлдлийг нь үнэлж Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын зүгээс “Авьяас” алтан медалиар шагнасныг өчигдөр гардуулан өгчээ.
Мөн Нийслэлийн Гэр бүл, хүүхэд, залуучуудын хөгжлийн газрын зүгээс баатарлаг хүүг Батлан хамгаалах яамны харьяа “Шонхор” зусланд амрах эрхийн бичгээр шагнасан байна.
Ж.Тэмүүжин хүү өөрийн сонирхлоор усанд сэлж сурсан бөгөөд тэр үед хүүхэд живж байгааг хараад сандарсандаа шууд л усруу орсон тухайгаа ярьжээ.
Сүүлийн үед бороо их орсны улмаас усны түвшин их нэмэгдсэн. Аялж зугаалахдаа хүүхдэдээ тавих анхаарлаа хором ч алдалгүй санаа тавьж, үер усны аюулаас урьдчилан сэргийлэхийг уриаллаа.
Эх сурвалж: НГБХЗХГ
Сэтгэгдэл (1)