Орос улс өнгөрөгч 2018 онд гадаадад зэвсэг худалдахаар төлөвлөж байсан хэмжээнээсээ хоёр хувь давуулан наймаа хийсэн гэж ОХУ-ын Ерөнхийлөгч Владимир Путин мэдэгдсэн байна. Ийм байдлаар орос өнгөрсөн онд гадаад орнуудад 16 тэрбум ам.долларын зэвсэг худалдаалжээ. 2019 оны эхний таван сард ч гэсэн манай зэвсэг техникийн эрэлт дэлхийн зах зээл дээр өндөр хэвээр байна гэж ОХУ-ын Төрийн тэргүүн Цэрэг техникийн хамтын ажиллагааны комиссын хуралдаан дээр мэдэгджээ.
Дэлхийн зэвсгийн зах зээл дээр ОХУ хоёрдугаар байрт орж нийт захиалгын хэмжээ 54 тэрбум ам.долларт хүрч, цэргийн бүтээгдхүүний наймаанаас олох ашиг 45 хувь өсчээ. 2018 онд зөвхөн нисэх онгоц, нисдэг тэрэг, нисгэгчгүй аппарат гээд зургаан тэрбум ам.долларын бүтээгдхүүнээ гадаадын худалдан авагчдад нийлүүлсэн гэж үүний өмнө “Рособоронэкспорт” мэдээлсэн.
Дэлхий даяар худалдаалж байгаа нийт зэвсэг техникийн 57 хувийг зөвхөн АНУ, ОХУ хоёр улс худалдаж байгаа гэж Стокгольмын энхийн асуудлаарх хүрээлэн гаргасан байдаг юм. Энд АНУ 36 хувийг эзэлдэг бол ОХУ 21 хувийг эзэлдэг байна.
Эх сурвалж: "Ардчилал таймс" сонин
