БНАСАУ-ын удирдагч Ким Жон Уны төрсөн дүү Ким Ё Жон тус улсын дээд удирдлагынхны хүрээнд орсон тухай Өмнөд Солонгосын парламентын гишүүн Ли Хэ Хун мэдээлжээ.
Солонгосын Хөдөлмөрийн намын, Төв хорооны суртал ухуулгын хэлтсийн нэгдүгээр орлогч даргын албыг хашдаг Ким Ё Жон өнгөрсөн долоо хоногт болсон нэгэн арга хэмжээний үеэр Солонгосын Хөдөлмөрийн намын, Төв хорооны Нэгдсэн фронтын газрын дарга Ким Ён Чольтой зэрэгцэн суусан явдал нь үүнийг нотолж байна гэж Ли Хэ Хун Үндэсний тагнуулын албаны төлөөлөгчдын хууль тогтоогчдод зориулсан хаалттай хурлын дараа мэдээлэл хийхдээ хэлсэн байна.
Өмнөд Солонгосын тагнуулчид энэ явдалд үндэслэн Ким Ё Жоны Умард Солонгосын дээд удирдлагынхан дунд эзлэх байр суурь өссөн гэдэг дүгнэлтийг хийжээ. “Түүнийг өндөр албан тушаалд дэвшүүлсэн бололтой” гэж Ли Хэ Хун онцлон хэлсэн байна. Өмнөд Солонгосын тагнуулын албаныхны үзэж байгаагаар, Ким Жөн Уны дүү одоо СХН-ын ТХ-ны орлогч даргын албан тушаалтай эн зэрэгцэх албыг хашиж байгаа аж.
Өмнөд Солонгосын парламентын гишүүний мэдээлснээр бол Ким Жон Уны протоколын албаны даргын үүргийг одоо БНАСАУ-д маш алдартай, "Самжиён" чуулгын дарга Хён Сон Вольд шилжүүлнэ. Энэ үүргийг өмнө нь чухамдаа Ким Жон Уны дүү гүйцэтгэдэг байсан билээ. Хён Сон Воль нь 2018 онд Пёнчан хотод болсон өвлийн Олимпын наадамд тоглосныхоо дараа Өмнөд Солонгост ч бас алдартай болжээ.
